ეს კანონი განსაზღვრავს საქართველოს ფინანსთა სამინისტროს სისტემაში შემავალი საჯარო სამართლის იურიდიული პირის – საქართველოს ფინანსთა სამინისტროს მომსახურების სააგენტოს მიერ სახელმწიფოს საკუთრებაში მიქცეული ქონების განკარგვის სამართლებრივ საფუძვლებსა და ძირითად პირობებს, ამ ქონების განკარგვის პრინციპებსა და მიმართულებებს.
ამ კანონის მიზნებისათვის კანონში გამოყენებულ ტერმინებს აქვს შემდეგი მნიშვნელობა: ა) სააგენტო – საქართველოს ფინანსთა სამინისტროს სისტემაში შემავალი საჯარო სამართლის იურიდიული პირი – საქართველოს ფინანსთა სამინისტროს მომსახურების სააგენტო; ბ) სახელმწიფოს საკუთრებაში მიქცეული ქონება (შემდგომში – ქონება) – სახელმწიფოს საკუთრებაში მემკვიდრეობის გზით გადასული ქონება, სახელმწიფოს საკუთრებაში გადასული უპატრონო და უმკვიდრო ქონება, სახელმწიფოს საკუთრებაში ჩუქების გზით გადასული რეალიზაციას დაქვემდებარებული ქონება, საქართველოს სისხლის სამართლის კოდექსით გათვალისწინებული დანაშაულისა და საქართველოს ადმინისტრაციულ სამართალდარღვევათა კოდექსით გათვალისწინებული სამართალდარღვევების შედეგად ჩამორთმეული და სახელმწიფოს საკუთრებაში მიქცეული ქონება, საქართველოს საგადასახადო კოდექსით გათვალისწინებული საკონტროლო შესყიდვის შემდეგ დაუბრუნებელი საქონელი, საქართველოს საბაჟო კოდექსით გათვალისწინებული სამართალდარღვევების შედეგად უსასყიდლოდ ჩამორთმეული და სახელმწიფოს საკუთრებაში მიქცეული საქონელი ან/და სატრანსპორტო საშუალება, საქართველოს საბაჟო კოდექსის შესაბამისად სახელმწიფოს საკუთრებაში გადაცემული საქონელი, სისხლის სამართლის საქმეზე ნივთიერ მტკიცებულებად მიჩნეული მოძრავი ნივთი და სისხლის სამართლის საქმესთან დაკავშირებული სხვა ქონება, რომელიც კანონის თანახმად ექვემდებარება სახელმწიფოს საკუთრებაში მიქცევას, სახელმწიფოს საკუთრებაში მიქცეული, სპეციალური ჭრების განხორციელების შედეგად მიღებული მერქნული რესურსი, ტყითმოსარგებლისათვის (მათ შორის, ლიცენზიატისათვის) ტყითსარგებლობის ვადის ამოწურვის ან შეწყვეტის შემდეგ სახელმწიფო ტყის ფონდიდან გამოუზიდავი მერქნული რესურსი, გამოყოფილ ტყეკაფამდე მისასვლელი სატყეო-სამეურნეო გზის მშენებლობისას მიღებული მერქნული რესურსი, „სააღსრულებო წარმოებათა შესახებ“ საქართველოს კანონით სახელმწიფოს საკუთრებაში მიქცეული ქონება, საქართველოს საგადასახადო კოდექსით გათვალისწინებული სახელმწიფოს საკუთრებაში მიქცეული ქონება; გ) ქონების განკარგვა – სააგენტოს მიერ ქონების რეალიზაცია, განაწილება და განადგურება საქართველოს კანონმდებლობით დადგენილი წესით; დ) ქონების რეალიზაცია – სააგენტოს მიერ ქონების რეალიზაცია საჯარო აუქციონის მეშვეობით, პირდაპირი მიყიდვის ფორმით ან მესამე პირის მეშვეობით; ე) ქონების განაწილება – სააგენტოს მიერ ქონების უსასყიდლოდ გადაცემა საქართველოს კანონმდებლობით დადგენილი წესით; ვ) ქონების განადგურება – სააგენტოს მიერ ქონების განადგურება საქართველოს კანონმდებლობით დადგენილი წესით; ზ) მესამე პირი – ფიზიკური ან იურიდიული პირი, რომელიც ქონების რეალიზაციას ახორციელებს სააგენტოსთან გაფორმებული ხელშეკრულების შესაბამისად. საქართველოს 20 10 წლის 8 აპრილ ის კანონი № 2920 - სსმ I, № 21 , 22 .0 4 .20 10 წ., მუხ. 120
ქონების განკარგვა ხორციელდება საქართველოს კონსტიტუციის, საქართველოს სამოქალაქო კოდექსის, ამ კანონის და სხვა სამართლებრივი აქტების საფუძველზე.
1.საქართველოში ქონების განკარგვის ეფექტიანი პოლიტიკის გატარების უზრუნველსაყოფად სახელმწიფოსაგან უფლებამოსილი ორგანო არის საქართველოს ფინანსთა სამინისტრო, რომელიც სააგენტოს მეშვეობით ახორციელებს ქონების რეალიზაციას, განაწილებასა და განადგურებას, გარდა ამ მუხლის მე-2 პუნქტით გათვალისწინებული შემთხვევისა.
2.სახელმწიფოს საკუთრებაში მიქცეულ უძრავ ქონებას შესაბამისი ადმინისტრაციული ორგანოს შუამდგომლობის საფუძველზე, სასამართლოს გადაწყვეტილებით განკარგავს საქართველოს ეკონომიკური განვითარების სამინისტრო ან სააგენტო. საქართველოს ეკონომიკური განვითარების სამინისტრო ქონებას განკარგავს საქართველოს კანონმდებლობით დადგენილი წესით.
ქონების განკარგვის ფორმებია: ა) ქონების რეალიზაცია საჯარო აუქციონის მეშვეობით (მათ შორის, ელექტრონული გზით); ბ) ქონების რეალიზაცია პირდაპირი მიყიდვის ფორმით: ბ.ა) ერთ პირთან მოლაპარაკების საშუალებით; ბ.ბ) სავაჭრო ობიექტების (მათ შორის, ინტერნეტმაღაზიის) საშუალებით; გ) ქონების რეალიზაცია მესამე პირის მეშვეობით; დ) ქონების განაწილება; ე) ქონების განადგურება.
1.ქონების განკარგვის შესახებ გადაწყვეტილებას საქართველოს ფინანსთა მინისტრთან შეთანხმებით იღებს სააგენტო, გარდა ამ მუხლის მე-4 პუნქტით გათვალისწინებული შემთხვევისა.
2.ქონების რეალიზაცია საჯარო აუქციონის მეშვეობით ხორციელდება საჯარო ვაჭრობის გზით.
3.ქონების რეალიზაცია პირდაპირი მიყიდვის ფორმით, ერთ პირთან მოლაპარაკების ან სავაჭრო ობიექტების საშუალებით, ასევე ქონების რეალიზაცია მესამე პირის მეშვეობით შესაძლებელია ქონების სპეციფიკიდან ან/და ღირებულებიდან გამომდინარე.
4.თუ საქართველოს ადმინისტრაციულ სამართალდარღვევათა კოდექსით გათვალისწინებული სამართალდარღვევის შედეგად უსასყიდლოდ ჩამორთმეული ან საქართველოს საბაჟო კოდექსით გათვალისწინებული სამართალდარღვევების შედეგად უსასყიდლოდ ჩამორთმეული, მალფუჭებადი პროდუქციის კატეგორიას მიკუთვნებული საქონლის ღირებულება არ აღემატება საქართველოს ფინანსთა მინისტრის ბრძანებით განსაზღვრულ ოდენობას, მისი სოციალური მიზნებისათვის განაწილების თაობაზე გადაწყვეტილებას იღებს ქონების ჩამორთმევაზე უფლებამოსილი ორგანო ან თანამდებობის პირი აღნიშნული საქონლის კონფისკაციის შესახებ ადმინისტრაციული სახდელის ან საბაჟო სანქციის აღსრულებისთანავე.
5.ქონება შეიძლება გადაეცეს სახელმწიფო და ადგილობრივი თვითმმართველობის ორგანოებს, ასევე სხვა დაწესებულებებსა და ორგანიზაციებს საქართველოს ფინანსთა მინისტრთან შეთანხმებით. ქონება, სახეობის გათვალისწინებით, შეიძლება აგრეთვე გამოყენებულ იქნეს სოციალური მიზნებისათვის.
6.ქონება, რომლის რაიმე დანიშნულებით გამოყენება შეუძლებელია, განადგურდება საქართველოს ფინანსთა მინისტრთან შეთანხმებით.
7.ქონების რეალიზაცია მესამე პირის მეშვეობით ხორციელდება საქართველოს ფინანსთა მინისტრთან შეთანხმებით.
8.სახელმწიფოს საკუთრებაში მიქცეული ქონების საწყისი ფასის განსაზღვრის, ამ ქონების აღრიცხვის, შენახვის, შეფასებისა და განკარგვის წესი და პირობები, აგრეთვე რეალიზაციის შედეგად ამონაგები თანხის განაწილების წესი განისაზღვრება საქართველოს ფინანსთა მინისტრის ბრძანებით (ბრძანებებით).
1.ქონების განკარგვასთან დაკავშირებით სააგენტოს მიერ მიღებული გადაწყვეტილება ან განხორციელებული ქმედება შესაძლებელია გასაჩივრდეს საქართველოს კანონმდებლობით დადგენილი წესით.
2.ამ მუხლის პირველი პუნქტით გათვალისწინებული უფლება პირს წარმოეშობა სააგენტოს მიერ მიღებული გადაწყვეტილების ან განხორციელებული ქმედების შესახებ შეტყობინების მიღებიდან და ძალაშია ერთი წლის განმავლობაში.
1.ამ კანონის ამოქმედებიდან ერთი თვის ვადაში საქართველოს ფინანსთა მინისტრმა განსაზღვროს სახელმწიფოს საკუთრებაში მიქცეული ქონების საწყისი ფასი, ამ ქონების აღრიცხვის, შენახვის, შეფასებისა და განკარგვის წესი და პირობები, აგრეთვე რეალიზაციის შედეგად ამონაგები თანხის განაწილების წესი.
2.ამ მუხლის პირველი პუნქტით გათვალისწინებული სამართლებრივი აქტის (აქტების) გამოცემამდე ამ კანონით რეგულირებულ ურთიერთობებზე გავრცელდეს საქართველოს კანონმდებლობით გათვალისწინებული შესაბამისი დებულებები.
1.საქართველოს ფინანსთა მინისტრის მიერ ამ კანონის მე-8 მუხლის პირველი პუნქტით გათვალისწინებული სამართლებრივი აქტის (აქტების) გამოცემისთანავე ძალადაკარგულად ჩაითვალოს საქართველოს პრეზიდენტის 2004 წლის 9 ივნისის №209 ბრძანებულება „სახელმწიფოს საკუთრებაში მიქცეული ქონების აღრიცხვის, შენახვის, შეფასების, განადგურების, განაწილებისა და/ან რეალიზაციის წესის შესახებ“ დებულების დამტკიცების თაობაზე“.
2.ეს კანონი ამოქმედდეს გამოქვეყნებისთანავე. საქართველოს პრეზიდენტი მიხეილ სააკაშვილი თბილისი , 2009 წლის 25 დეკემბერი . №2467 – რს შეტანილი ცვლილებები:
1.საქართველოს 20 10 წლის 8 აპრილ ის კანონი № 2920 - სსმ I, № 21 , 22 .0 4 .20 10 წ., მუხ. 120 2. ძალადაკარგულია - საქართველოს 2010 წლის 21 ივლისის კანონი №3512 - სსმ I, №48, 09.08.2010 წ., მუხ.312
