1.ცივ-გომბორის დაცული ლანდშაფტის მართვა ხორციელდება საქართველოს ორგანული კანონის „ადგილობრივი თვითმმართველობის კოდექსი“, საქართველოს ტყის კოდექსის, „დაცული ტერიტორიების სისტემის შესახებ“ საქართველოს კანონის, ცივ-გომბორის დაცული ლანდშაფტის მენეჯმენტის გეგმის ან დროებითი რეგულირების წესის და საქართველოს სხვა საკანონმდებლო და კანონქვემდებარე ნორმატიული აქტების შესაბამისად.
2.ცივ-გომბორის დაცულ ლანდშაფტს მართავს გურჯაანის მუნიციპალიტეტი სახელმწიფოს მიერ დელეგირებული უფლებამოსილებების ფარგლებში, რისთვისაც გამოიყოფა შესაბამისი ფინანსური რესურსი.
3.ცივ-გომბორის დაცული ლანდშაფტის ტერიტორიაზე არსებულ სახელმწიფო ტყეს მართავს საქართველოს გარემოს დაცვისა და სოფლის მეურნეობის სამინისტროს სისტემაში შემავალი საჯარო სამართლის იურიდიული პირი − ეროვნული სატყეო სააგენტო ტყის მართვის გეგმისა და ცივ-გომბორის დაცული ლანდშაფტის მენეჯმენტის გეგმის ან დროებითი რეგულირების წესის შესაბამისად.
4.ცივ-გომბორის დაცული ლანდშაფტის მართვასთან დაკავშირებული ცალკეული საკითხების შესასწავლად და სათანადო დასკვნებისა და რეკომენდაციების მოსამზადებლად გურჯაანის მუნიციპალიტეტის საკრებულო საქართველოს კანონმდებლობის შესაბამისად ქმნის სათათბირო ორგანოს (საბჭოს).
5.სათათბირო ორგანოს (საბჭოს) შემადგენლობა, უფლებები, მოვალეობები და მის საქმიანობასთან დაკავშირებული სხვა პროცედურული საკითხები განისაზღვრება სათათბირო ორგანოს (საბჭოს) დებულებით, რომელსაც ამტკიცებს გურჯაანის მუნიციპალიტეტის საკრებულო საქართველოს კანონმდებლობის შესაბამისად.
6.სათათბირო ორგანოს (საბჭოს) შემადგენლობაში შედიან გურჯაანის მუნიციპალიტეტის წარმომადგენლები, საქართველოს გარემოს დაცვისა და სოფლის მეურნეობის სამინისტროს შესაბამისი სტრუქტურული ერთეულის (ერთეულების) და სხვა დაინტერესებული მხარეების წარმომადგენლები ბიოლოგიური მრავალფეროვნების, დაცული ტერიტორიებისა და ტყის სფეროებში ერთიანი სახელმწიფო პოლიტიკის განხორციელების უზრუნველსაყოფად. სათათბირო ორგანოს (საბჭოს) გადაწყვეტილება სარეკომენდაციო ხასიათისაა და ვრცელდება ცივ-გომბორის დაცული ლანდშაფტის ტერიტორიაზე.
7.სახელმწიფოს მიერ გურჯაანის მუნიციპალიტეტისთვის დელეგირებული უფლებამოსილებებია: ა) ცივ-გომბორის დაცული ლანდშაფტის მართვა, დაცვა და მისი ბუნებრივი რესურსებით მდგრადი სარგებლობის უზრუნველყოფა; ბ) საკუთარი კომპეტენციის ფარგლებში ცივ-გომბორის დაცული ლანდშაფტის მენეჯმენტის გეგმის შემუშავება, მისი განხორციელების მონიტორინგი და ანგარიშგება; გ) ცივ-გომბორის დაცული ლანდშაფტის ტერიტორიაზე დაკვირვების/მონიტორინგის განხორციელებისა და მეცნიერული კვლევა-ძიების ჩატარების ორგანიზება, მიღებული მონაცემების დამუშავება, შენახვა და გავრცელება; დ) ცივ-გომბორის დაცული ლანდშაფტის მდგომარეობის (ბიოლოგიური მრავალფეროვნება, დაცვა, მონიტორინგი, დაფინანსება და სხვა) შესახებ ანგარიშის რეგულარულად მომზადება და გამოქვეყნება; ე) ცივ-გომბორის დაცული ლანდშაფტის ადმინისტრირება; ვ) ცივ-გომბორის დაცული ლანდშაფტის ფუნქციონირებისთვის აუცილებელი სამშენებლო საქმიანობისა და კეთილმოწყობის სამუშაოების (ბილიკის, ზღუდის, თავშესაფრისა და გზამკვლევის მოწყობის და სხვა) განხორციელების ორგანიზება; ზ) ცივ-გომბორის დაცულ ლანდშაფტთან დაკავშირებით საერთაშორისო თანამშრომლობა და შესაბამის პროგრამებში მონაწილეობა; თ) სამთავრობო დაწესებულებებთან, ადგილობრივ და საერთაშორისო არასამთავრობო ორგანიზაციებთან თანამშრომლობა; ი) დაინტერესებულ საზოგადოებასთან თანამშრომლობა; კ) ცივ-გომბორის დაცული ლანდშაფტის ტერიტორიაზე ტურისტული მომსახურების გაწევის ტარიფების განსაზღვრა; ლ) საქართველოს ადმინისტრაციულ სამართალდარღვევათა კოდექსის 239-ე მუხლის 4 4 ნაწილით განსაზღვრული კოდექსის მუხლებითა და მუხლების ნაწილებით გათვალისწინებულ ადმინისტრაციულ სამართალდარღვევათა ოქმების შედგენა; მ) საქართველოს საკანონმდებლო და კანონქვემდებარე ნორმატიული აქტებით (მათ შორის, ცივ-გომბორის დაცული ლანდშაფტის მენეჯმენტის გეგმით ან დროებითი რეგულირების წესით) გათვალისწინებული სხვა საქმიანობების განხორციელება.
8.ამ მუხლით გათვალისწინებული სახელმწიფოს მიერ გურჯაანის მუნიციპალიტეტისთვის დელეგირებული უფლებამოსილებების განხორციელებაზე დარგობრივ ზედამხედველობას ახორციელებს საქართველოს გარემოს დაცვისა და სოფლის მეურნეობის სამინისტრო საქართველოს ორგანული კანონის „ადგილობრივი თვითმმართველობის კოდექსი“ შესაბამისად.
