ამნისტიის შესახებ

გათავისუფლდნენ სასჯელისაგან, თავისუფლების აღკვეთის სახით დანიშნული ვადის მიუხედავად პირები, რომლებიც ამ კანონის ძალაში შესვლის დროისათვის მსჯავრდებული არიან საქართველოს რესპუბლიკის სისხლის სამართლის კოდექსის 91-ე მუხლის მეორე ნაწილით და აგრეთვე სისხლის სამართლის კოდექსის იმ მუხლებით, რომლებიც არ ითვალისწინებენ თავისუფლების აღკვეთას 5 წელზე მეტი ხნის ვადით (გარდა საქართველოს რესპუბლიკის სისხლის სამართლის კოდექსის 97-ე მუხლის პირველი ნაწილის, 153-ე მუხლის პირველი და მეორე ნაწილების, 154-ე მუხლის მეორე ნაწილის, 160-ე მუხლის, 169 7 მუხლის პირველი ნაწილის, 187-ე მუხლის მეორე ნაწილის, 194-ე მუხლის, 195-ე მუხლის პირველი ნაწილის, 252-ე მუხლის მესამე, მეოთხე, მეხუთე, მეექვსე, მეშვიდე ნაწილების, 252 1 მუხლის პირველი, მეოთხე ნაწილების, 252 2 მუხლის და 252 3 მუხლის პირველი ნაწილისა) და ადრე არ ყოფილან მსჯავრდებულნი განზრახი დანაშაულისათვის თავისუფლების აღკვეთით.

შეწყდეს ყველა საგამოძიებო ორგანოში იმ დანაშაულთა გამო აღძრული საქმეების წარმოება და სასამართლოებში ის განუხილველი საქმეები, რომლებიც ამ კანონის პირველი მუხლით გათვალისწინებულმა პირებმა ჩაიდინეს კანონის ძალაში შესვლამდე.

განთავისუფლდნენ სასჯელისაგან მსჯავრდებული არასრულწლოვანები, პირველი და მეორე ჯგუფის ინვალიდები, ქალები და 60 წელს გადაცილებული მამაკაცები, რომლებსაც მისჯილი აქვთ თავისუფლების აღკვეთა ვადით ხუთ წლამდე ჩათვლით (გარდა საქართველოს რესპუბლიკის სისხლის სამართლის კოდექსის 75-მუხლის მესამე ნაწილის, 105-ე მუხლის, 110-ე მუხლის მეორე ნაწილის, 117-ე მუხლის პირველი და მესამე ნაწილების, 133 1 მუხლის, 152-ე მუხლის პირველი ნაწილის, 209 1 მუხლის, 252-ე მუხლის, 252 1 , 252 2 , 252 3 და 252 5 მუხლებისა) და ადრე არ ყოფილან მსჯავრდებულნი განზრახი დანაშაულისათვის თავისუფლების აღკვეთით. ეს მუხლი არ შეეხებათ მძიმე დანაშაულის ჩამდენ იმ პირებს, რომელთა მიმართ სასამართლოს სასჯელის განსაზღვრისას გამოიყენა საქართველოს რესპუბლიკის სისხლის სამართლის კოდექსის 45-ე მუხლი.

გაუნახევრდეთ სასჯელის მოუხდელი ნაწილი გაუფრთხილებელი დანაშაულისათვის მსჯავრდებულ პირებს, რომლებიც არ მიეკუთვნებიან ამ კანონის პირველი და მესამე მუხლით გათვალისწინებულთა კატეგორიას და ადრე არ ყოფილან მსჯავრდებულნი განზრახი დანაშაულისათვის თავისუფლების აღკვეთით.

გათავისუფლდნენ სასჯელისაგან მსჯავრდებულნი, რომელთა ძირითადი სასჯელი არ ითვალისწინებს თავისუფლების აღკვეთას და ადრე არ ყოფილან მსჯავრდებულნი განზრახი დანაშაულისათვის თავისუფლების აღკვეთით.

ამ კანონის საფუძველზე სასჯელისაგან გათავისუფლებული პირები არ თავისუფლდებიან დამატებითი სასჯელისაგან; მათ ნასამართლობა მოეხსენებათ კანონით დადგენილი წესით.

ეს კანონი ამოქმედდეს 1995 წლის 2 ივნისიდან და შესრულდეს ორი თვის განმავლობაში. საქართველოს პარლამენტის თავმჯდომარე – სახელმწიფოს მეთაური ედუარდ შევარდნაძე. საქართველოს პარლამენტის სპიკერი ვახტან გოგუაძე. თბილისი, 1995 წლის 2 ივნისი. N 748 – IIს