წილის გადაცემა შეზღუდული პასუხისმგებლობის საზოგადოებაში
ბიზნესიდან გასვლის ერთ-ერთი გზა წილის გასხვისებაა. სამეწარმეო კოდექსის 141-ე მუხლის თანახმად, პარტნიორს შეუძლია გადასცეს (გაასხვისოს ან უფლებრივად დატვირთოს) თავისი წილი შეზღუდული პასუხისმგებლობის საზოგადოებისა და პარტნიორთა თანხმობის გარეშე. ის გადაწყვეტილება, რომელიც ზღუდავს, კრძალავს ან/და თანხმობაზე დამოკიდებულს ხდის წილის გადაცემას, მიიღება მხოლოდ ყველა იმ პარტნიორის თანხმობით, რომელსაც ეს შეზღუდვა ან აკრძალვა ეხება. წილის გადაცემის შესახებ შეთანხმება წერილობით უნდა გაფორმდეს და მისი გაფორმებისთანავე ამის თაობაზე საზოგადოებას ეცნობება. წილის გადაცემა ძალაში შედის მარეგისტრირებელი ორგანოს მიერ წილის ახალი პარტნიორის სახელზე რეგისტრაციისთანავე, ხოლო კეთილსინდისიერი შემძენის დაცვის ნორმები ამ დროს გამოიყენება. წილის გასხვისების მომენტში გასხვისებულ წილთან დაკავშირებული შეუსრულებელი ვალდებულებებისთვის საზოგადოების წინაშე სოლიდარულად პასუხს აგებენ გამსხვისებელი და შემძენი პარტნიორები, თუ წესდებით სხვა რამ არ არის გათვალისწინებული.
შერწყმა და გაყოფა როგორც გასვლის ფორმა
კოდექსის 65-ე მუხლი ინვესტორის გასვლის ალტერნატიულ ინსტრუმენტებს აწესრიგებს. ერთი ან ერთზე მეტი სამეწარმეო საზოგადოება ლიკვიდაციის პროცედურის დაწყების გარეშე შეიძლება მიუერთდეს სხვა საზოგადოებას საკუთარი აქტივებისა და ვალდებულებების სრულად გადაცემით, რის სანაცვლოდაც მიერთებული საზოგადოების პარტნიორები წილებს იღებენ შემძენ საზოგადოებაში; ორი ან მეტი საზოგადოება ასევე შეიძლება გაერთიანდეს ახლის დაფუძნებით. დაყოფა ხდება დაფუძნებით ან შეძენით, ხოლო გამოყოფის შემთხვევაში საზოგადოება თავისი აქტივებისა და ვალდებულებების ნაწილს გადასცემს ახალ ან არსებულ საზოგადოებას. გაერთიანებაში ყოფილი საზოგადოებების პარტნიორებს წილების გარდა შესაძლოა ფულადი ანაზღაურებაც მიიღონ, თუ წილების გადაცვლის თანაფარდობის დაცვა შეუძლებელია — სააქციო საზოგადოების შემთხვევაში ეს ანაზღაურება არ უნდა აღემატებოდეს გასაცემი წილების ნომინალური ღირებულების 10 პროცენტს. შერწყმაში მონაწილე საზოგადოებებს შეიძლება სხვადასხვა სამართლებრივი ფორმა ჰქონდეთ, ხოლო მიერთებული საზოგადოების რეგისტრაცია უქმდება ლიკვიდაციის გარეშე. დაუშვებელია შემძენი სააქციო საზოგადოების აქციების გაცემა გაყოფილი ან მიერთებული საზოგადოების იმ აქციების სანაცვლოდ, რომლელსაც თვით შემძენი ან გაყოფილი საზოგადოება ფლობს, ხოლო დაშლილი საზოგადოების მიმართ შერწყმა ან გაყოფა შესაძლებელია, თუ ქონების განაწილება პარტნიორებს შორის არ დაწყებულა. შერწყმის შემთხვევაში გაერთიანებული საზოგადოება პასუხს აგებს შერწყმულთა ყველა ვალდებულებისთვის, გაყოფის შემთხვევაში კი ახალი ან შემძენი საზოგადოება გაყოფილის ვალდებულებებისთვის სოლიდარულად პასუხობს, თუმცა ეს პასუხისმგებლობა გაყოფით მისთვის მიკუთვნებული წმინდა აქტივის ოდენობით იზღუდება.