მუხლი 21. საქართველოს ცენტრალური ბიუჯეტის შემოსავალი

1. საქართველოს ცენტრალური ბიუჯეტის შემოსავალში, გარდა ამ კანონის 30-ე მუხლით გათვალისწინებული შემთხვევებისა, მთლიანად ჩაირიცხება საქართველოს საგადასახადო და საბაჟო კოდექსებით გათვალისწინებული შემდეგი საერთო-სახელმწიფოებრივი გადასახადები: ა) დამატებული ღირებულების გადასახადი და „ტრანსპორტისა და კომუნიკაციების სფეროს სახელმწიფო მართვისა და რეგულირების წესის შესახებ“ საქართველოს კანონით დაწესებული სატრანსპორტო საქმიანობის რეგულირების ყოველწლიური საფასურისა ; ბ) აქციზი , გარდა საავტომობილო ბენზინის აქციზის თანხებისა, რომლებიც მიიმართება სახელმწიფო საგზაო ფონდში და აქციზური მარკების დაბეჭდვის, ტრანსპორტირებისა და მიმოქცევასთან დაკავშირებული სხვა ხარჯების დასაფარავად გათვალისწინებული სახსრებისა, რომლებიც ირიცხება ხაზინაში გახსნილ სპეციალურ ანგარიშზე და რომელთა ოდენობა ერთ მარკასთან მიმართებაში განისაზღვრება საქართველოს სახელმწიფო საგადასახადო დეპარტამენტის მიერ საქართველოს ეკონომიკისა და ფინანსთა სამინისტროებთან შეთანხმებით ; გ) საბაჟო გადასახადი. 1 1 . (ამოღებულია).

2. საქართველოს ცენტრალურ ბიუჯეტში, ამ მუხლის პირველ პუნქტში მითითებული გადასახადების გარდა, აგრეთვე ჩაირიცხება საქართველოს პარლამენტის მიერ დამტკიცებული გრძელვადიანი ეკონომიკური ნორმატივების მიხედვით სხვა ბიუჯეტებში გადასაცემი ანარიცხების გამოკლების შემდეგ დარჩენილი მოგების, საშემოსავლო, ფიქსირებული და მცირე ბიზნესის გადასახადების ნაწილი.