ადვოკატთა ასოციაციის 2025 წლის არჩევნების გზამკვლევი

მოსვლამდე: რა უნდა იცოდეთ

საჭირო დოკუმენტაცია

თითოეულმა წევრმა აუცილებლად თან უნდა იქონიოს ქვემოთ ჩამოთვლილი პირადობის დამადასტურებელი დოკუმენტებიდან ერთ-ერთი:

*   საქართველოს მოქალაქის პასპორტი;

*   პირადობის (ID) მოწმობა;

*   მართვის მოწმობა.

წევრებმა სასურველია თან იქონიონ ადვოკატის საქმიანობის უფლების დამადასტურებელი მოწმობა, რომელიც წარდგენილ უნდა იქნეს ზემოთჩამოთვლილილ პირადობის დამადასტურებელი დოკუმენტებიდან ერთ-ერთან ერთად . თუ ვერ შეძლებთ აღნიშნული მოწმობის წარმოდგენას, თქვენი იდენტიფიცირება მოხდება ადვოკატთა ერთიან სიაში თქვენი პირადობის დამადასტურებელი დოკუმენტის საფუძველზე.

დამკვირვებელთა რეგისტრაცია (8-10 დეკემბერი)

თუ თქვენ წარმოადგენთ სადამკვირვებლო ორგანიზაციას ან თავმჯდომარეობის კანდიდატის მიერ დანიშნული ხართ დამკვირვებლად, დოკუმენტაცია უნდა წარადგინოთ პირადად ადვოკატთა ასოციაციის ოფისში (თინათინ ვირსალაძის I ჩიხი, თბილისი) 8 დეკემბრის 10:00 საათიდან 10 დეკემბრის 18:00 საათამდე.

*   სადამკვირვებლო ორგანიზაციებისთვის: თქვენი ორგანიზაცია უნდა იყოს რეგისტრირებული არასამეწარმეო (არაკომერციული) იურიდიული პირი, რომელსაც გააჩნია მართლმსაჯულებისა და არჩევნების მონიტორინგის სფეროში საქმიანობის არანაკლებ ხუთწლიანი გამოცდილება. თითოეულ ორგანიზაციას შეუძლია დანიშნოს არაუმეტეს ორი დამკვირვებლისა.

*   თავმჯდომარეობის კანდიდატებისთვის: თითოეულ კანდიდატს უფლება აქვს დანიშნოს არაუმეტეს ოთხი დამკვირვებლისა.

*   მოთხოვნები დამკვირვებლის მიმართ: დამკვირვებელი უნდა იყოს საქართველოს ქმედუნარიანი სრულწლოვანი მოქალაქე.

პირველი დღე: 13 დეკემბერი, 2025

დილის რეგისტრაცია (09:00 - 10:30)

კარები იღება 09:00 საათზე „ექსპო ჯორჯიას“ მე-11 პავილიონში. ადგილზე მისვლისას დაგხვდებათ 12 სარეგისტრაციო მაგიდა, რომლებიც განაწილებულია ადვოკატთა სიითი ნომრების მიხედვით. რეგისტრაციის პროცესი მიმდინარეობს შემდეგნაირად:

სამანდატო კომისიის წევრი გადაამოწმებს თქვენს ვინაობას ადვოკატთა ერთიან სიაში. ერთიან სიაში შესაბამის გრაფაში ხელმოწერის შემდეგ, თქვენ გადმოგეცემათ კრების თარიღის აღმნიშვნელი სპეციალური ბეჭდით დამოწმებული მანდატი. აღნიშნული მანდატი, თქვენს იდენტობის დამადასტურებელ დოკუმენტთან ერთად, წარმოადგენს თქვენს საშვს პირველი დღის ღონისძიებებზე დასასწრებად.

მნიშვნელოვანი შენიშვნა დროის შესახებ: თუ 10:30 საათისთვის რეგისტრირებულ წევრთა რაოდენობა 800-ზე ნაკლები იქნება, 10:40 საათზე მოწვეულ იქნება განმეორებითი კრება. განმეორებითი კრება უფლებამოსილია დამსწრეთა რაოდენობის მიუხედავად. განმეორებითი კრებისთვის რეგისტრაცია გრძელდება 12:00 საათამდე. 12:00 საათის შემდეგ პირველი დღის ღონისძიებებზე დაშვება შეწყდება.

ელექტრონულ პორტალზე წვდომა

რეგისტრაციის დროს, ადვოკატთა ერთიან სიაში მითითებულ მობილური ტელეფონის ნომერზე SMS-შეტყობინების სახით მიიღებთ უნიკალურ კოდს. ეს კოდი გაძლევთ წვდომას ელექტრონულ საარჩევნო პორტალზე — www.saertokreba.gba.ge, ხმის დამთვლელი კომისიის არჩევნებში მონაწილეობის მისაღებად. თუ ტექნიკური ხარვეზის გამო კოდს ვერ მიიღებთ, მას სამანდატო კომისიის წევრები გადმოგცემენ. თუ არ გაგაჩნიათ პორტალზე შესასვლელად საჭირო ტექნიკური საშუალებები, შეგიძლიათ ისარგებლოთ სარეგისტრაციო დარბაზში განთავსებული მოწყობილობებით.

დღის აქტივობები (12:00 - 16:00)

12:00 - კრების გახსნა

რეგისტრაცია სრულდება და სამანდატო კომისიის მიერ ითვლება რეგისტრირებულ წევთა რაოდენობა. კრების თავმჯდომარე აცხადებს დამსწრეთა რაოდენობას და კრების უფლებამოსილების საკითხს.

12:00 - 12:30 - ხმის დამთვლელი კომისიის წევრობის კანდიდატთა თვითდასახელება

პირველ დღეს რეგისტრირებულ წევრებს შეუძლიათ საკუთარი თავი დაასახელონ ხმის დამთვლელი კომისიის წევრობის კანდიდატად. კომისია დაკომპლექტდება 15 წევრისგან. თუმცა, გარკვეულ პირებს ეკრძალებათ აღნიშნული პოზიციის შეთავსება: რომელიმე არჩევითი ორგანოს (თავმჯდომარე, აღმასრულებელი საბჭო, ეთიკის კომისია ან სარევიზიო კომისია) წევრობის კანდიდატები და სამანდატო კომისიის წევრები ვერ იქნებიან ხმის დამთვლელი კომისიის კანდიდატები ან წევრები.

12:30 - 14:00 - ხმის დამთვლელი კომისიის არჩევნები

წევრები ხმას აძლევენ ხმის დამთვლელი კომისიის კანდიდატებს ელექტრონული პორტალის მეშვეობით. თითოეულ წევრს შეუძლია ხმა მისცეს მინიმუმ ერთ და არაუმეტეს 15 კანდიდატს. არჩეულად ჩაითვლება საუკეთესო შედეგის მქონე 15 კანდიდატი. ხმების თანაბრად გაყოფის შემთხვევაში, თუ კანდიდატთა რაოდენობა აღემატება ვაკანტურ ადგილებს, არჩეულად ჩაითვლება ის კანდიდატი, რომელიც უფრო ადრე გაწევრიანდა ასოციაციაში (აქვს რიგითობით უფრო დაბალი სიითი ნომერი).

სამანდატო კომისია ამუშავებს და აჯამებს შედეგებს ელექტრონული პორტალის მონაცემებზე დაყრდნობით. შედეგებს აცხადებს კრების თავმჯდომარე.

ტექნიკური რეზერვი: თუ ელექტრონული კენჭისყრა შეუძლებელი გახდება ტექნიკური ან პროგრამული ხარვეზების გამო, ხმის დამთვლელი კომისიის არჩევნები ჩატარდება ღია კენჭისყრით, მანდატების გამოყენებით, კრების მიმდინარეობისას.

14:00 - 15:00 - წლიური ანგარიშები

თავმჯდომარე, ეთიკის კომისია და სარევიზიო კომისია წარადგენენ 2025 წლის წლიურ ანგარიშებს.

15:00 - 16:00 - კანდიდატთა გამოსვლები

თავმჯდომარეობის კანდიდატებს, რომელთაც სურთ კრების წინაშე სიტყვით გამოსვლა, ეძლევათ 10-წუთიანი რეგლამენტი.

საღამოს შესვენება (13 დეკემბრის 16:00 - 14 დეკემბრის 10:00)

კრებაზე ცხადდება შესვენება. წევრებმა უნდა შეინარჩუნონ მანდატები და პირადობის დამადასტურებელი დოკუმენტები მეორე დღისთვის.

მეორე დღე: 14 დეკემბერი, 2025

მთავარი ღონისძიება: არჩევნები

მეორე დღე იმართება „ექსპო ჯორჯიას“ მე-4 და მე-5 პავილიონებში. ამ დღეს ასოციაცია ირჩევს თავმჯდომარეს, აღმასრულებელი საბჭოს წევრებს, ეთიკის კომისიის წევრებსა და სარევიზიო კომისიის წევრებს ფარული კენჭისყრის გზით.

რეგისტრაცია და ბიულეტენების გაცემა (10:00 - 19:00)

ვის აქვს მონაწილეობის უფლება: რეგისტრაციის გავლა, ბიულეტენების მიღება და ხმის მიცემა შეუძლიათ როგორც პირველ დღეს რეგისტრირებულ წევრებს, ასევე ასოციაციის იმ მოქმედ წევრებს, რომლებიც არიან ერთიან სიაში და გამოცხადდებიან მეორე დღეს.

სარეგისტრაციო ზონაში განლაგებულია ადვოკატთა სიითი ნომრების მიხედვით დაჯგუფებული მაგიდები. ამ მაგიდებს ერთობლივად ემსახურებიან ხმის დამთვლელი და სამანდატო კომისიის წევრები. თქვენი ვინაობის დადასტურების შემდეგ, ერთიან სიაში შესაბამის გრაფაში ხელს აწერთ და იღებთ:

*   ერთ საარჩევნო ბიულეტენს;

*   ერთ ფარულობის უზრუნველმყოფ ჩარჩო-კონვერტს;

*   ბიულეტენის შევსებისა და ჩარჩო-კონვერტის გამოყენების ინსტრუქციას.

ბიულეტენის გაცნობა

ბიულეტენი წარმოადგენს ერთ ფურცელს, რომელიც დაყოფილია ხუთ სვეტად:

1.  თავმჯდომარეობის კანდიდატები;

2.  აღმასრულებელი საბჭოს წევრობის კანდიდატები;

3.  ეთიკის კომისიის (ადვოკატი წევრები) წევრობის კანდიდატები;

4.  ეთიკის კომისიის (არაადვოკატი წევრები) წევრობის კანდიდატები;

5.  სარევიზიო კომისიის წევრობის კანდიდატები.

თითოეულ სვეტში კანდიდატები დალაგებულია ანბანური თანმიმდევრობით (გვარების მიხედვით, „ა“-დან „ჰ“-მდე). თითოეული კანდიდატის სახელის გასწვრივ არის წრე ხმის მისაცემად. ბიულეტენს აქვს უსაფრთხოების სპეციალური უნიკალური შტრიხკოდი.

ხმის მიცემის წესი

ბიულეტენისა და ფარულობის ჩარჩო-კონვერტის მიღების შემდეგ, გაემართეთ კენჭისყრის ზონისკენ, სადაც სპეციალური კაბინები უზრუნველყოფენ პროცესის ფარულობას. მოცემული სპეციალური მარკერის გამოყენებით გააფერადეთ სასურველი კანდიდატების სახელების გასწვრივ არსებული წრეები.

ხმის მიცემის ლიმიტები სექციების მიხედვით:

*   თავმჯდომარე: ზუსტად 1 კანდიდატი;

*   აღმასრულებელი საბჭო: არაუმეტეს 11 კანდიდატისა;

*   ეთიკის კომისია (ადვოკატი წევრები): არაუმეტეს 12 კანდიდატისა;

*   ეთიკის კომისია (არაადვოკატი წევრები): არაუმეტეს 3 კანდიდატისა;

*   სარევიზიო კომისია: არაუმეტეს 5 კანდიდატისა.

რა შემთხვევაშია ბიულეტენის სექცია ბათილი:

*   თუ მონიშნულია იმაზე მეტი კანდიდატი, ვიდრე დაშვებულია შესაბამის სექციაში;

*   თუ არ არის მონიშნული არცერთი კანდიდატი შესაბამის სექციაში (მიუხედავად სხვა მონიშვნებისა ან წარწერებისა).

ბიულეტენის მოთავსება ყუთში

ბიულეტენის შევსების შემდეგ, მოათავსეთ იგი ფარულობის ჩარჩო-კონვერტში და მიდით საარჩევნო ყუთთან. საარჩევნო ყუთი აღჭურვილია ხმის დამთვლელი ელექტრონული აპარატით (PCOS ტიპის ოპტიკური სკანერი), რომელიც ასკანერებს და ითვლის ხმებს ბიულეტენის მოთავსებისას.

ბიულეტენი საარჩევნო ყუთში უნდა მოათავსოთ ოპტიკური სკანერის მეშვეობით. თუ შეგექმნებათ სირთულე, ტექნიკური ჯგუფის წევრმა შეიძლება გაგიწიოთ დახმარება ხმის დამთვლელი და სამანდატო კომისიის წევრების მეთვალყურეობის ქვეშ.

თუ აპარატმა არ მიიღო ბიულეტენი, იგი ითვლება დაზიანებულად და შეიძლება შეიცვალოს დაზიანებული ბიულეტენის შეცვლის წესის შესაბამისად (იხ. ქვემოთ).

ბიულეტენის მოთავსების შემდეგ, ფარულობის ჩარჩო-კონვერტი დატოვეთ სპეციალურად გამოყოფილ მაგიდაზე და დარბაზი დატოვეთ გასასვლელი კარის მეშვეობით. უკან დაბრუნება დასაშვებია მხოლოდ კანდიდატებისთვის გამოყოფილ ზონაში.

მნიშვნელოვანი წესები

*   კენჭისყრის კაბინაში ერთდროულად შეიძლება იმყოფებოდეს მხოლოდ ერთი პირი;

*   დაუშვებელია ხმის მიცემის პროცესის განზრახ შეყოვნება;

*   აკრძალულია ხმაურის გამოწვევა ან საარჩევნო პროცესისთვის სხვაგვარად ხელის შეშლა;

*   აკრძალულია ბიულეტენის გატანა კენჭისყრის დარბაზიდან; ბიულეტენით გასვლის შემთხვევაში, კენჭისყრის ზონაში ვეღარ დაბრუნდებით;

*   თავმჯდომარის არჩევნების შედეგების ხელით გადათვლა გადაიცემა ვიდეოტრანსლაციით და იწერება რეალურ დროში;

*   კანდიდატებს შეუძლიათ თვალი ადევნონ არჩევნების პროცესის ვიდეოტრანსლაციას რეალურ დროში კანდიდატთა ზონაში განთავსებულ სპეციალურ მონიტორებზე.

დაზიანებული ბიულეტენები

თუ ბიულეტენი დაგიზიანდათ, დაბრუნდით სარეგისტრაციო მაგიდასთან და წარადგინეთ დაზიანებული ბიულეტენი. მას ჩამოეჭრება ზედა მარჯვენა კუთხე და შეინახება, თქვენ კი გადმოგეცემათ ახალი ბიულეტენი.

ტექნიკური გაუთვალისწინებელი შემთხვევები

თუ ტექნიკური პრობლემების გამო ვერ ხერხდება ბიულეტენის სკანერში მოთავსება, ხმის დამთვლელი და სამანდატო კომისიის თავმჯდომარეები, ტექნიკური ჯგუფის წარმომადგენლებთან ერთად, ხსნიან აპარატს საარჩევნო ყუთიდან. წევრებს შეუძლიათ ბიულეტენები მოათავსონ სხვა ოპტიკურ სკანერში ან, თუ ეს შეუძლებელია, პირდაპირ საარჩევნო ყუთში.

დახურვის დრო (19:00)

ზუსტად 19:00 საათზე კენჭისყრის დარბაზის კარი იკეტება. წევრებს, რომლებიც ამ დროს უკვე რიგში დგანან, კენჭისყრაში მონაწილეობის უფლება ეძლევათ. ხმის დამთვლელი და სამანდატო კომისიის წევრები აღწერენ რიგში მდგომთა რაოდენობას და მათ ვინაობას. ამის შემდეგ, კენჭისყრაში მონაწილეობა შეუძლიათ მხოლოდ რიგში მდგომ პირებსა და ხმის დამთვლელი კომისიის წევრებს.

ხმის დათვლის პროცესი (19:00 - 21:00)

კენჭისყრის დასრულების შემდეგ იწყება ხმის დათვლა ხმის დამთვლელი ელექტრონული აპარატების გამოყენებით. 5 წევრისგან შემდგარი ტექნიკური მხარდაჭერის ჯგუფი უზრუნველყოფს ოპტიკური სკანერების გამართულ ტექნიკურ და პროგრამულ მუშაობას.

დათვლისწინა პროცედურები

დათვლის დაწყებამდე, ხმის დამთვლელი და სამანდატო კომისიის თავმჯდომარეები, ტექნიკური ჯგუფის დახმარებითა და თავმჯდომარეობის კანდიდატების თანდასწრებით (მათი სურვილის შემთხვევაში), ამოწმებენ, რომ საარჩევნო ყუთები ცარიელია, რის შემდეგაც ამონტაჟებენ აპარატებს ყუთებზე. ამ პროცესის შესახებ დგება ოქმი, რომელსაც ხელს აწერენ ორივე კომისიის თავმჯდომარეები.

აპარატების დამონტაჟების შემდეგ, თითოეული აპარატიდან იბეჭდება „ნულოვანი ანგარიში“, რომელიც ადასტურებს, რომ იმ დროისთვის აპარატის მეშვეობით ხმა არცერთ წევრს არ მიუცია. ნულოვანი ანგარიშები ინახება კომისიის თავმჯდომარეებთან.

შედეგების შეჯამება

კენჭისყრის დასრულების შემდეგ, ყოველი სამი აპარატიდან მიღებული შედეგები ერთიანდება „შემაჯამებელი შედეგების ანგარიშებში“, რომლებიც წარმოადგენს ხმის დათვლის ოფიციალურ მონაცემებს. საბოლოო შედეგები მიიღება ყველა შემაჯამებელი ანგარიშის პროგრამული გაერთიანებით.

თითოეული შემაჯამებელი შედეგების ანგარიში უნდა შეიცავდეს:

*   სკანირებული ბიულეტენების რაოდენობას;

*   ნამდვილი ბიულეტენების რაოდენობას;

*   ბათილი ბიულეტენების რაოდენობას;

*   თითოეული კანდიდატის მიერ მიღებული ხმების რაოდენობას.

ხელით გადამოწმება

შემაჯამებელი ანგარიშის მონაცემების გადამოწმების მიზნით, ხმის დამთვლელი კომისიის წევრები ხელით ითვლიან თავმჯდომარეობის კანდიდატების მიერ მიღებულ ხმებს. საარჩევნო ყუთები თავსდება თვალსაჩინო ადგილას მაგიდებზე და საჯაროდ ცხადდება თითოეული კანდიდატის ხმების რაოდენობა.

ხელით გადათვლაში მონაწილეობა უნდა მიიღოს ხმის დამთვლელი კომისიის არანაკლებ სამმა წევრმა, რათა პროცესი ვალიდური იყოს. ხელით გადათვლის მთლიანი პროცესი გადაიცემა ვიდეოტრანსლაციით და იწერება რეალურ დროში.

შემაჯამებელი ოქმი

შემაჯამებელი ანგარიშებისა და ხელით გადამოწმების პროცედურის საფუძველზე, ხმის დამთვლელი კომისია ადგენს არჩევნების შედეგების შემაჯამებელ ოქმს, რომელსაც ხელს აწერენ კომისიის თავმჯდომარე და წევრები.

თუ ხმის დამთვლელი კომისიის თავმჯდომარე არ აწერს ხელს, ოქმს ხელი უნდა მოაწეროს კომისიის მდივანმა და კომისიის არანაკლებ სამმა წევრმა. თუ თავმჯდომარეც და მდივანიც უარს აცხადებენ ხელმოწერაზე, ოქმს ხელს აწერენ კომისიის არანაკლებ სამი წევრი და/ან საერთო კრების თავმჯდომარე.

რას უნდა მოიცავდეს ოქმი

*   ოქმის შედგენის თარიღსა და დროს;

*   ადვოკატთა ერთიან სიაში არსებულ ადვოკატთა რაოდენობას;

*   რეგისტრირებულ ადვოკატთა რაოდენობას;

*   კენჭისყრაში მონაწილე ადვოკატთა რაოდენობას;

*   გამოყენებული ბიულეტენების რაოდენობას;

*   ბათილად ცნობილი ბიულეტენების რაოდენობას;

*   თითოეული კანდიდატის მიერ მიღებული ხმების რაოდენობას;

*   არჩეული პირების სახელებს, გვარებსა და პირად ნომრებს.

გამარჯვებულების გამოვლენა

თავმჯდომარე: საუკეთესო შედეგის მქონე კანდიდატი, რომელმაც მიიღო დამსწრე წევრთა ხმების უბრალო უმრავლესობა. თუ ვერცერთმა კანდიდატმა ვერ მიაღწია ამ შედეგს, 14 დღის ვადაში ინიშნება მეორე ტური საუკეთესო შედეგის მქონე ორ კანდიდატს შორის.

აღმასრულებელი საბჭო: აირჩევა საუკეთესო შედეგის მქონე 11 კანდიდატი.

ეთიკის კომისია (ადვოკატი წევრები): აირჩევა საუკეთესო შედეგის მქონე 12 კანდიდატი.

ეთიკის კომისია (არაადვოკატი წევრები): აირჩევა საუკეთესო შედეგის მქონე 3 კანდიდატი.

ეთიკის კომისია (სარეზერვო წევრები): საუკეთესო შედეგის მქონე მომდევნო 6 კანდიდატი, რომელიც ვერ მოხვდა კომისიის შემადგენლობაში, ხდება სარეზერვო წევრი.

სარევიზიო კომისია: აირჩევა საუკეთესო შედეგის მქონე 5 კანდიდატი.

განმეორებითი კენჭისყრა

თუ აღმასრულებელი საბჭოს, ეთიკის კომისიის ან სარევიზიო კომისიის კანდიდატებმა მიიღეს ხმების თანაბარი რაოდენობა და მათი რიცხვი აღემატება ასარჩევ რაოდენობას, 14 დღის ვადაში ინიშნება განმეორებითი კენჭისყრა საუკეთესო შედეგის მქონე იმ კანდიდატებს შორის, რომთა რაოდენობაც შეესაბამება შესავსებ ადგილებს. არჩეულად ჩაითვლება ის კანდიდატი, რომელიც მიიღებს მეტ ხმას.

შედეგების გამოცხადება (21:00)

კრების თავმჯდომარე საჯაროდ აცხადებს არჩევნების შედეგებს. აღნიშნული ინფორმაცია ასევე ქვეყნდება ასოციაციის ოფიციალურ ვებგვერდზე: www.gba.ge.

ბიულეტენში მითითებულ ყველა კანდიდატს უფლება აქვს მოითხოვოს არჩევნების შედეგების შემაჯამებელი ოქმის ასლი.

კრების დახურვა (21:15)

კრება ოფიციალურად იხურება 21:15 საათზე.

დამკვირვებლის უფლებები და პროცედურები

დამკვირვებლებს უფლება აქვთ დააკვირდნენ კრების მიმდინარეობას ჩარევის გარეშე. მათ შეუძლიათ აწარმოონ ვიდეო და აუდიო ჩაწერა, თუ ეს არ არღვევს ხმის მიცემის ფარულობას და ხელს არ უშლის კრების პროცესს.

დამკვირვებლები უნდა იმყოფებოდნენ ხმის დამთვლელი კომისიის მიერ განსაზღვრულ ზონაში. კანდიდატებს შეუძლიათ თვალი ადევნონ არჩევნების პროცესის ვიდეოტრანსლაციას რეალურ დროში კანდიდატთა ზონაში განთავსებულ სპეციალურ მონიტორებზე.

კანდიდატთა მიერ მონიტორინგი

თავმჯდომარეობის, აღმასრულებელი საბჭოს, ეთიკის კომისიისა და სარევიზიო კომისიის წევრობის ყველა კანდიდატს შეუძლია დააკვირდეს არჩევნების მიმდინარეობას რეალურ დროში ვიდეოტრანსლაციის მეშვეობით, კანდიდატთა ზონაში განთავსებულ სპეციალურ მონიტორებზე.

დოკუმენტაციის შენახვა

ბიულეტენები ინახება ოთხი წლის განმავლობაში. ამ ვადის გასვლის შემდეგ ისინი შეიძლება განადგურდეს, რაზეც დგება ასოციაციის თავმჯდომარისა და აღმასრულებელი მდივნის მიერ ხელმოწერილი ოქმი.

გამოუყენებელი და გაფუჭებული ბიულეტენები ითვლება ცალკე, ილუქება და დგება შესაბამისი ოქმი, რომელსაც ხელს აწერენ ხმის დამთვლელი და სამანდატო კომისიის თავმჯდომარეები.

ტექნიკური და ადმინისტრაციული დეტალები

სამანდატო კომისია შედგება არაუმეტეს 30 წევრისგან (ასოციაციის აპარატის თანამშრომლები და/ან მომსახურების ხელშეკრულებით დასაქმებული პირები), რომელსაც ჰყავს ასოციაციის თავმჯდომარის მიერ დანიშნული თავმჯდომარე. სამანდატო კომისიის თავმჯდომარე ხელმძღვანელობს და ორგანიზებას უწევს კომისიის საქმიანობას და ფლობს ადვოკატთა ერთიან სიას როგორც ნაბეჭდი (აკინძული და ბეჭდით დამოწმებული), ისე ელექტრონული სახით.

ადვოკატთა ერთიანი სია შეიცავს ინფორმაციას თითოეული ადვოკატის შესახებ: სახელი, გვარი, სიითი ნომერი და პირადი ნომერი. ელექტრონული ვერსიები დამატებით მოიცავს ასოციაციაში გაწევრიანების თარიღსა და მობილური ტელეფონის ნომერს.

კრების თავმჯდომარე (როგორც წესი, ასოციაციის თავმჯდომარე) ხსნის და უძღვება კრებას, მართავს დღის წესრიგს, გასცემს და წყვეტს სიტყვით გამოსვლის უფლებას, ატარებს კენჭისყრას, აცხადებს შედეგებს, აცხადებს შესვენებებს, უზრუნველყოფს რეგლამენტის დაცვას და ხელს აწერს კრების ოქმებს.

კრების მდივანი, რომელსაც ნიშნავს ასოციაციის თავმჯდომარე სამანდატო კომისიის შემადგენლობიდან, ამზადებს კრების ოქმს.

დარბაზში დაბრუნების პროცედურები

თუ პირველ დღეს დატოვებთ დარბაზს, უკან შესვლას შეძლებთ მხოლოდ მანდატისა და პირადობის დამადასტურებელი დოკუმენტის წარდგენის შემთხვევაში.

წესრიგის დაცვა

კრების თავმჯდომარე გააფრთხილებს ნებისმიერ პირს, რომლის ქმედებაც ხელს უშლის კრების მიმდინარეობას. პირი შეიძლება გაძევებულ იქნეს დარბაზიდან, თუ იგი:

*   გაფრთხილების მიღების შემდეგ კვლავ განაგრძობს პროცესის ხელის შეშლას;

*   გამოცხადდება იარაღით ან სხვა აკრძალული ნივთებით;

*   თავისი ქმედებით შლის კრებას ან მოუწოდებს სხვა წევრებს ასეთი ქმედებისკენ.

კანდიდატურის მოხსნა

კანდიდატებს შეუძლიათ მოხსნან თავიანთი კანდიდატურა კრების დაწყებამდე წერილობითი განცხადების წარდგენის გზით. თუ კანდიდატი მოხსნის კანდიდატურას, ბიულეტენში მისი სახელის გასწვრივ გაკეთდება აღნიშვნა „მოხსნილია“ და ამ კანდიდატისთვის მიცემული ხმები საბოლოო შედეგებში არ ჩაითვლება. კრების მიმდინარეობისას კანდიდატურის მოხსნა დაუშვებელია.

გზამკვლევი მომზადებულია სსიპ საქართველოს ადვოკატთა ასოციაციის 2025 წლის 13 – 14 დეკემბრის საერთო კრების რეგლამენტი-ს საფუძველზე