საჯარო შეთავაზების ცნება
საჯარო გაყიდვის საფუძველია ფასიანი ქაღალდების საჯარო შეთავაზება. „საფონდო ბაზრის შესახებ“ კანონის მიხედვით, საჯარო შეთავაზება არის წინადადება არანაკლებ 100 პირისათვის ან წინასწარ დაუზუსტებელი რაოდენობის პირთათვის ემიტენტის სახელით ფასიანი ქაღალდების პირდაპირი ან არაპირდაპირი მიყიდვის შესახებ. საჯარო შეთავაზებად მიიჩნევა ასევე არაანგარიშვალდებული საწარმოს ფასიან ქაღალდებთან დაკავშირებით იმ პირის სახელით წამოყენებული ამგვარი წინადადება, რომელიც ემიტენტი არ არის. ემიტენტმა საბროკერო კომპანიასთან ან შესაბამისი ლიცენზიის მქონე ფინანსურ ინსტიტუტთან უნდა დადოს ფასიანი ქაღალდების შეთავაზების ხელშეკრულება განთავსების შესახებ, ხოლო ნებისმიერ სხვა პირს, რომელიც საჯარო შეთავაზებას ახორციელებს, ეროვნულ ბანკს თავისი ხელმოწერილი ინფორმაცია უნდა წარუდგინოს. ასეთ შემთხვევაში ეროვნულ ბანკს შეუძლია შეთავაზების განსხვავებული წესიც დაადგინოს. მნიშვნელოვანია, რომ მხოლოდ გამოცდილი ინვესტორებისათვის შეთავაზება და მიყიდვა საჯარო შეთავაზებად არ განიხილება, ხოლო საჯარო შეთავაზების დროს სხვა ემიტენტის ფასიანი ქაღალდების მფლობელსაც შეუძლია ემიტენტს წინადადებით მიმართოს, რომ შეთავაზებაში საკუთარი ფასიანი ქაღალდებიც შეიტანოს.