1.ნებართვის მაძიებელმა ნებართვის მისაღებად ნებართვის გამცემს უნდა წარუდგინოს: ა) სანებართვო ქმედების დამადასტურებელი გარიგების/დოკუმენტის დედანი ან მისი დამოწმებული ასლი; ბ) პროდუქციის ტექნიკური მახასიათებლების აღწერილობა; გ) კომისიის დადებითი რეკომენდაცია: გ.ა) ორმაგი დანიშნულების პროდუქციაზე - კანონის მე-10 მუხლის მე-2 პუნქტით განსაზღვრულ შემთხვევებში; გ.ბ) სამხედრო პროდუქციაზე - კანონის მე-9 მუხლით გათვალისწინებული ნებართვების გაცემის დროს; დ) საქმისათვის მნიშვნელობის მქონე გარემოებების დასადგენად საჭირო დოკუმენტაცია, ნებართვის გამცემის მოთხოვნის შემთხვევაში; ე) სანებართვო ქმედების განსახორციელებლად საჭირო „ლიცენზიებისა და ნებართვების შესახებ“ საქართველოს კანონით განსაზღვრული შესაბამისი ლიცენზია ან/და ნებართვა, ასეთის არსებობის შემთხვევაში.
2.ამ მუხლის პირველი პუნქტით განსაზღვრული დოკუმენტაციის გარდა, ნებართვის მაძიებელი ნებართვის გამცემს: ა) ექსპორტის შემთხვევაში წარუდგენს: ა.ა) სამხედრო პროდუქციის იმპორტიორი ქვეყნის უფლებამოსილი ორგანოს მიერ გაცემულ პროდუქციის იმპორტის ნებართვას ან მის დამოწმებულ ასლს; ა.ბ) სერტიფიკატს ან მის დამოწმებულ ასლს, გარდა იმ შემთხვევისა, როდესაც პროდუქცია უბრუნდება გამომგზავნს ექსპორტიორ ქვეყანაში; ბ) ტრანზიტის შემთხვევაში წარუდგენს: ბ.ა) გადამზიდველისათვის გადაზიდვის უფლებამოსილების მინიჭების დამადასტურებელ დოკუმენტაციას ან მის დამოწმებულ ასლს; ბ.ბ) ექსპორტიორი და იმპორტიორი ქვეყნების უფლებამოსილი ორგანოების მიერ გაცემულ: ბ.ბ.ა) სამხედრო პროდუქციის ექსპორტის და იმპორტის ნებართვებს ან მათ დამოწმებულ ასლს; ბ.ბ.ბ) ორმაგი დანიშნულების პროდუქციის ექსპორტის და იმპორტის ნებართვებს ან მათ დამოწმებულ ასლს, თუ ექსპორტიორი და იმპორტიორი ქვეყნების კანონმდებლობა ითვალისწინებს ამგვარ ნებართვებს; ბ.გ) სერტიფიკატს ან მის დამოწმებულ ასლს; გ) ტექნიკური დახმარების შემთხვევაში, წარუდგენს სერტიფიკატს ან მის დამოწმებულ ასლს; დ) საბროკერო მომსახურების შემთხვევაში, წარუდგენს იმპორტიორი ქვეყნის მიერ გაცემულ სერტიფიკატს ან მის დამოწმებულ ასლს.