1.სახელმწიფო უსაფრთხოების აკადემიისთვის საქართველოს სახელმწიფო უსაფრთხოების სამსახური ამ კანონით დადგენილი წესით: ა) სამინისტროს დასკვნის გათვალისწინებით, „ნორმატიული აქტების შესახებ“ საქართველოს ორგანული კანონის შესაბამისად ამტკიცებს სახელმწიფო უსაფრთხოების აკადემიის წესდებას; ბ) პასუხისმგებელია სახელმწიფო უსაფრთხოების აკადემიის მიერ საქართველოს ნორმატიული აქტების შესრულებისთვის; გ) უზრუნველყოფს სახელმწიფო უსაფრთხოების აკადემიის პროგრამულ დაფინანსებას ან/და ახორციელებს მისგან მომსახურების შესყიდვას; დ) მონაწილეობს სახელმწიფო უსაფრთხოების აკადემიის ავტორიზაციისა და აკრედიტაციის პირობების შემუშავებაში.
2.სახელმწიფო უსაფრთხოების აკადემია უფლებამოსილია განახორციელოს სახელმწიფო უსაფრთხოების სამაგისტრო პროგრამა და მისი წესდებით გათვალისწინებული სპეციალური პროფესიული საგანმანათლებლო პროგრამები და სხვა საგანმანათლებლო პროგრამები.
3.სახელმწიფო უსაფრთხოების აკადემიის სტუდენტთან დადებული ხელშეკრულებით, აგრეთვე საქართველოს სახელმწიფო უსაფრთხოების სამსახურის უფროსის სამართლებრივი აქტებით შეიძლება შეიზღუდოს ან/და განსხვავებულად მოწესრიგდეს ამ კანონით გათვალისწინებული სტუდენტის უფლებები და მოვალეობები.
4.ამ კანონსა და საქართველოს სახელმწიფო უსაფრთხოების სამსახურის მოსამსახურესთან ან სპეციალური წოდების მქონე პირთან ურთიერთობის მარეგულირებელ სამართლებრივ აქტებს შორის წინააღმდეგობის არსებობის შემთხვევაში გამოიყენება შესაბამისად საქართველოს სახელმწიფო უსაფრთხოების სამსახურის მოსამსახურესთან ან სპეციალური წოდების მქონე პირთან ურთიერთობის მარეგულირებელი სამართლებრივი აქტები.
5.სახელმწიფო უსაფრთხოების აკადემიის წესდებით შეიძლება განისაზღვროს ამ კანონით გათვალისწინებული სახელმწიფოს მიერ დაფუძნებული უმაღლესი საგანმანათლებლო დაწესებულების სტრუქტურისგან განსხვავებული სტრუქტურა, სტრუქტურული ერთეულების ფუნქციები და მართვის ორგანოები, აგრეთვე დადგინდეს უმაღლესი წარმომადგენლობითი ორგანოს დაკომპლექტებისა და რექტორის თანამდებობის დაკავების განსხვავებული წესები.
6.საქართველოს სახელმწიფო უსაფრთხოების სამსახურის საჭიროებიდან გამომდინარე, სახელმწიფო უსაფრთხოების აკადემიის ფუნქციები, მოვალეობები და საქმიანობის წესი საქართველოს სახელმწიფო უსაფრთხოების სამსახურის შესაბამისი სპეციალური კანონმდებლობით შეიძლება ამ კანონისგან განსხვავებულად განისაზღვროს.