აკრედიტაციის არსი, მიზანი და სტანდარტები
აკრედიტაციის მიზანია განათლების ხარისხის ასამაღლებლად უმაღლესი საგანმანათლებლო დაწესებულების სისტემატური თვითშეფასების დამკვიდრება და ხარისხის უზრუნველყოფის მექანიზმების განვითარების ხელშეწყობა საგანმანათლებლო პროგრამის აკრედიტაციის სტანდარტებთან მისი შესაბამისობის განსაზღვრის გზით. აკრედიტაციის სტანდარტებია: საგანმანათლებლო პროგრამის მიზანი, სწავლის შედეგები და მათთან პროგრამის შესაბამისობა; სწავლების მეთოდოლოგია და ორგანიზება, პროგრამის ათვისების შეფასების ადეკვატურობა; სტუდენტების მიღწევები და მათთან ინდივიდუალური მუშაობა; სწავლების რესურსებით უზრუნველყოფა; სწავლების ხარისხის განვითარების შესაძლებლობები.
აკრედიტაციის საერთო წესებიდან არსებობს გამონაკლისები: მართლმადიდებლური საღვთისმეტყველო უმაღლესი საგანმანათლებლო დაწესებულების საღვთისმეტყველო პროგრამებზე და ქუთაისის საერთაშორისო უნივერსიტეტის მიერ განხორციელებულ საგანმანათლებლო პროგრამებზე ეს წესები არ ვრცელდება. ამავდროულად, უმაღლესი საგანმანათლებლო პროგრამის, მათ შორის ერთობლივი პროგრამის, აკრედიტაცია შეიძლება განახორციელოს უცხოურმა ორგანიზაციამ, რომელსაც შესაბამისი კომპეტენცია გააჩნია და რომელიც აღიარებულია განათლების ხარისხის განვითარების ეროვნული ცენტრის მიერ აკრედიტაციის დებულებით დადგენილი წესით. ქართულ ენაში მომზადების საგანმანათლებლო პროგრამის განხორციელება კი მხოლოდ აკრედიტაციის გავლის შემთხვევაშია შესაძლებელი.