აღმწერი 1. პროფესიულ კვალიფიკაციათა აღმწერით განისაზღვრება პროფესიული განათლების ცალკეული საფეხურის შესაბამისი სწავლის შედეგები ექვსი კრიტერიუმის მიხედვით: ა) ცოდნა და გაცნობიერება; ბ) ცოდნის პრაქტიკაში გამოყენების უნარი; გ) დასკვნის უნარი; დ) კომუნიკაციის უნარი; ე) სწავლის უნარი; ვ) ღირებულებები.
2.კვალიფიკაციის ყოველი შემდგომი საფეხური მოიცავს წინა საფეხურის სწავლის შედეგებს და გამოიხატება უფრო მაღალი პროფესიული ცოდნით, გაზრდილი უნარებითა და ღირებულებებით.
3.პროფესიული განათლების პირველი საფეხურის სწავლის შედეგებია: ა) ცოდნა და გაცნობიერება – სფეროს საფუძვლების ზოგადი ცოდნა და მარტივი ამოცანების შესასრულებლად აუცილებელი ნაბიჯების გაცნობიერება; ბ) ცოდნის პრაქტიკაში გამოყენების უნარი – სტრუქტურირებულ გარემოში უშუალო ხელმძღვანელობით მარტივი და ერთგვაროვანი დავალებების შესრულება ძირითადი მასალებისა და ინსტრუმენტების გამოყენებით; გ) დასკვნის უნარი – ხელმძღვანელის მითითებების გათვალისწინებით სამუშაო პროცესში გამოვლენილი მარტივი პრობლემების ამოცნობა; დ) კომუნიკაციის უნარი – პროფესიასთან დაკავშირებულ მარტივ საკითხებზე ზეპირი და წერილობითი კომუნიკაცია. საინფორმაციო და საკომუნიკაციო ტექნოლოგიების, ასევე უცხოური ენის საბაზო დონეზე ფლობა; ე) სწავლის უნარი – სხვისი ხელმძღვანელობით სწავლა; ვ) ღირებულებები – პროფესიული საქმიანობისათვის დამახასიათებელი ღირებულებების ცოდნა.
4.პროფესიული განათლების მეორე საფეხურის სწავლის შედეგებია: ა) ცოდნა და გაცნობიერება – სფეროს ფაქტობრივ გარემოებებზე დამყარებული ზოგადი ცოდნა და ძირითადი ამოცანების შესასრულებლად აუცილებელი ნაბიჯების გაცნობიერება; ბ) ცოდნის პრაქტიკაში გამოყენების უნარი – შეუძლია სტაბილურ გარემოში გარკვეული დამოუკიდებლობით წინასწარ განსაზღვრული დავალებების შესრულება ძირითადი მეთოდების, ინსტრუმენტებისა და მასალების გამოყენებით; გ) დასკვნის უნარი – პრობლემის გადასაჭრელად მიწოდებული ინფორმაციის გამოყენება და შესაბამისი სამუშაოს შესასრულებლად აუცილებელი დასკვნის გარკვეული დამოუკიდებლობით გაკეთების უნარი; დ) კომუნიკაციის უნარი – პროფესიასთან დაკავშირებულ მარტივ საკითხებზე დეტალური ზეპირი და წერილობითი კომუნიკაცია. საინფორმაციო და საკომუნიკაციო ტექნოლოგიების პროფესიული თვალსაზრისით გამოყენება. ელემენტარული დონის კომუნიკაცია უცხოურ ენაზე პროფესიასთან დაკავშირებულ საკითხებზე; ე) სწავლის უნარი – სხვისი ხელმძღვანელობით სწავლა დამოუკიდებლობის გარკვეული ხარისხით; ვ) ღირებულებები – პროფესიული საქმიანობისთვის დამახასიათებელი ღირებულებების გათავისება და მათ შესაბამისად მოქმედება.
5.პროფესიული განათლების მესამე საფეხურის სწავლის შედეგებია: ა) ცოდნა და გაცნობიერება – სფეროსათვის დამახასიათებელი ძირითადი ფაქტების, პრინციპების, პროცესებისა და ზოგადი კონცეფციების ცოდნა, გართულებული ამოცანების შესასრულებლად აუცილებელი ნაბიჯების გაცნობიერება; ბ) ცოდნის პრაქტიკაში გამოყენების უნარი – სფეროს სპეციფიკისათვის დამახასიათებელი უნარების ფართო სპექტრის გამოყენება, დავალებების შესასრულებლად სხვადასხვა მიდგომ ის შეფასება, სათანადო მეთოდების, ინსტრუმენტებისა და მასალების შერჩევა და მისადაგება; გ) დასკვნის უნარი – განსხვავებულ სიტუაციებში წა რ მოქმნილი პრობლემების გადასაჭრელად ინფორმაციის ცნობილი წყაროებით სარგებლობა, მათი შეფასება და ანალიზი; დ) კომუნიკაციის უნარი – ზეპირი და წერილობითი კომუნიკაცია პროფესიასთან დაკავშირებულ საკითხებზე განსხვავებულ სიტუაციებში, პროფესიულ საქმიანობასთან დაკავშირებული საინფორმაციო და საკომუნიკაციო ტექნოლოგიების ეფექტიანად გამოყენება, უცხო ენის პრაქტიკული გამოყენება; ე) სწავლის უნარი – წინასწარ განსაზღვრული ამოცანების ფარგლებში საკუთარ სწავლაზე პასუხისმგებლობის აღება; ვ) ღირებულებები – განსხვავებულ სიტუაციებში პროფესიული საქმიანობისათვის დამახასიათებელი ღირებულებების შესაბამისად მოქმედება.
6.პროფესიული განათლების მეოთხე საფეხურის სწავლის შედეგებია: ა) ცოდნა და გაცნობიერება – სფეროს ფაქტობრივ გარემოებებსა და თეორიულ საფუძვლებზე დამყარებული ცოდნა, პრობლემების გადაჭრის ზოგადი შესაძლებლობების გაცნობიერება; ბ) ცოდნის პრაქტიკაში გამოყენების უნარი – სამუშაოს დაგეგმვისა და შესრულების პროცესში სანდო ინფორმაციის წყაროების გამოყენება, წამოჭრილი სპეციფიკური ამოცანის დასაძლევად სტრატეგიის შემუშავება და მიღებული შედეგების შეფასება შესრულებული სამუშაოს გასაუმჯობესებლად; გ) დასკვნის უნარი – სპეციფიკური პრობლემების გადასაწყვეტად შესაბამისი მიდგომის შემუშავება, ალტერნატიული შესაძლებლობების განხილვა და მიღებული შედეგის ანალიზი; დ) კომუნიკაციის უნარი – ზეპირი და წერილობითი კომუნიკაცია პროფესიასთან დაკავშირებულ საკითხებზე ცვალებად სიტუაციებში, ახალი საინფორმაციო და საკომუნიკაციო ტექნოლოგიების დამოუკიდებლად ათვისება, უცხოურ ენაზე მიღებული პროფესიასთან დაკავშირებული ინფორმაციის დამუშავება; ე) სწავლის უნარი – საკუთარი სწავლის მიმართულებების დამოუკიდებლად განსაზღვრა განჭვრეტად, თუმცა ნაწილობრივ ცვალებად, ვითარებაში; ვ) ღირებულებები – პროფესიული საქმიანობისათვის დამახასიათებელი ღირებულებებისადმი პასუხისმგებლობით დამოკიდებულება და ცვალებად სიტუაციებში მათ შესაბამისად მოქმედება.
7.პროფესიული განათლების მეხუთე საფეხურის სწავლის შედეგებია: ა) ცოდნა და გაცნობიერება – პროფესიულ საქმიანობასთან დაკავშირებული მრავალმხრივი და/ან სპეციალიზებული თეორიული და პრაქტიკული ცოდნა, პროფესიული საქმიანობის შესაძლებლობების (საზღვრების) გაცნობიერება; ბ) ცოდნის პრაქტიკაში გამოყენების უნარი – შემეცნებითი და პრაქტიკული უნარების ფართო სპექტრის გამოყენება აბსტრაქტული პრობლემების შემოქმედებითად გადასაწყვეტად; გ) დასკვნის უნარი – გამოკვეთილი პრობლემების ამოცნობა, მათი გადაჭრისათვის სათანადო მონაცემების იდენტიფიცირება და ანალიზი სტანდარტული მეთოდების გამოყენებით, ასევე დასაბუთებული დასკვნების გაკეთება; დ) კომუნიკაციის უნარი – იდეებისა და ინფორმაციის სტრუქტურირებულად და თანმიმდევრულად გადაცემა სპეციალისტებისა და არასპეციალისტებისათვის ხარისხობრივი და რაოდენობრივი ინფორმაციის გამოყენებით. თანამედროვე საინფორმაციო და საკომუნიკაციო ტექნოლოგიების გამოყენება. უცხოურ ენაზე პროფესიასთან დაკავშირებული ინფორმაციის გადაცემა და ანგარიშის წარდგენა; ე) სწავლის უნარი – საკუთარი სწავლის მიმართულებების განსაზღვრა ცვალებად და გაუთვალისწინებელ ვითარებაში; ვ) ღირებულებები – პროფესიული საქმიანობისათვის დამახასიათებელ ღირებულებებთან თავისი და სხვათა დამოკიდებულების შეფასება და სხვებისთვის გაზიარება.