1.ცენტრის უფლებამოსილი თანამშრომელი კანონთან კონფლიქტში მყოფი არასრულწლოვანის ცენტრში გადამისამართების შესახებ ინფორმაციის მიღებიდან არაუგვიანეს 15 სამუშაო დღისა ამზადებს კანონთან კონფლიქტში მყოფი არასრულწლოვანის ინდივიდუალური შეფასების ანგარიშს, რომელიც განსაზღვრავს კანონთან კონფლიქტში მყოფი არასრულწლოვანის ინდივიდუალურ მახასიათებლებსა და საჭიროებებს.
2.კანონთან კონფლიქტში მყოფი არასრულწლოვანის ინდივიდუალური შეფასების ანგარიშში აისახება კანონთან კონფლიქტში მყოფი არასრულწლოვანის ბიოლოგიური, ფსიქოლოგიური და სოციალური მახასიათებლები, მათ შორის, ინფორმაცია ამ არასრულწლოვანის ფიზიკური, ემოციური, კოგნიტური განვითარებისა და ქცევითი თავისებურებების, ჯანმრთელობის მდგომარეობის, განათლების, სპორტული, შემოქმედებითი, სახელოვნებო ან სხვა კულტურული საქმიანობის, ოჯახის, საცხოვრებელი გარემოს შესახებ და სხვა საჭირო ინფორმაცია. ინდივიდუალური შეფასების ანგარიშში აგრეთვე აისახება კანონთან კონფლიქტში მყოფი არასრულწლოვანის განსაკუთრებული საჭიროებების, ქცევის თავისებურებების, მართლსაწინააღმდეგო ქმედების ჩადენის რისკისა და, შესაბამისად, ამ არასრულწლოვანის სათანადო განვითარების, მისი სოციალიზაციისა და საზოგადოებაში ინტეგრაციის ხელშეწყობისთვის საჭირო სერვისის/პროგრამის შესახებ ინფორმაცია.
3.ცენტრის უფლებამოსილი თანამშრომელი კანონთან კონფლიქტში მყოფი არასრულწლოვანის ინდივიდუალური შეფასების ანგარიშს წარუდგენს მულტიდისციპლინურ ჯგუფს, რომელიც ამ ინდივიდუალური შეფასების ანგარიშის საფუძველზე, კანონთან კონფლიქტში მყოფი არასრულწლოვანის საუკეთესო ინტერესების გათვალისწინებით განსაზღვრავს კანონთან კონფლიქტში მყოფი არასრულწლოვანის საჭიროებებზე მორგებულ სერვისს/პროგრამას, მისი შესრულების დროში გაწერილ ინდივიდუალურ გეგმას და კანონთან კონფლიქტში მყოფი არასრულწლოვანის ინდივიდუალური შეფასების ანგარიშის წარდგენიდან 10 სამუშაო დღის ვადაში იღებს გადაწყვეტილებას კანონთან კონფლიქტში მყოფი არასრულწლოვანის შესაბამის სერვისში/პროგრამაში ჩართვის შესახებ.
4.მულტიდისციპლინური ჯგუფი ამ მუხლის მე-3 პუნქტით განსაზღვრული გადაწყვეტილების მიღების პროცესში აგრეთვე განიხილავს და წყვეტს, ვინ უნდა უზრუნველყოს კანონთან კონფლიქტში მყოფი არასრულწლოვანის მონაწილეობა შესაბამის სერვისში/პროგრამაში.
5.თუ კანონთან კონფლიქტში მყოფი არასრულწლოვანის კანონიერ წარმომადგენელს შეუძლია უზრუნველყოს კანონთან კონფლიქტში მყოფი არასრულწლოვანის მონაწილეობა შესაბამის სერვისში/პროგრამაში და ეს არ ეწინააღმდეგება ამ არასრულწლოვანის საუკეთესო ინტერესებს, პრიორიტეტულად განიხილება კანონიერი წარმომადგენლის მიერ კანონთან კონფლიქტში მყოფი არასრულწლოვანის შესაბამის სერვისში/პროგრამაში მონაწილეობის უზრუნველყოფა.
6.თუ კანონიერი წარმომადგენელი ვერ უზრუნველყოფს კანონთან კონფლიქტში მყოფი არასრულწლოვანის შესაბამის სერვისში/პროგრამაში მონაწილეობას და კანონიერ წარმომადგენელთან ცხოვრება ეწინააღმდეგება კანონთან კონფლიქტში მყოფი არასრულწლოვანის საუკეთესო ინტერესებს, მულტიდისციპლინურ ჯგუფს უფლება აქვს, მიმართოს სააგენტოს საქართველოს კანონმდებლობით დადგენილი წესით ალტერნატიული ზრუნვის მიზნით კანონთან კონფლიქტში მყოფი არასრულწლოვანის სახელმწიფო ზრუნვაში განსათავსებლად კანონთან კონფლიქტში მყოფი არასრულწლოვანის მიერ შესაბამისი სერვისის/პროგრამის შესრულებისთვის საჭირო ვადით. ამ შემთხვევაში კანონთან კონფლიქტში მყოფი არასრულწლოვანის მიერ შესაბამისი სერვისის/პროგრამის განხორციელების უზრუნველსაყოფად სააგენტო თავისი უფლებამოსილების ფარგლებში ახორციელებს ყველა შესაძლო ღონისძიებას.
7.მულტიდისციპლინური ჯგუფის გადაწყვეტილებით განსაზღვრულ სერვისში/პროგრამაში კანონთან კონფლიქტში მყოფი არასრულწლოვანის მონაწილეობის საერთო ვადა არ უნდა იყოს 1 თვეზე ნაკლები და 12 თვეზე მეტი. ეს ვადა, საჭიროების შემთხვევაში, მულტიდისციპლინური ჯგუფის გადაწყვეტილებით, ყოველ ჯერზე შეიძლება გაგრძელდეს არაუმეტეს 12 თვით.
8.კანონთან კონფლიქტში მყოფი 14 წელს მიუღწეველი არასრულწლოვანი, რომელსაც მულტიდისციპლინური ჯგუფის გადაწყვეტილებით განსაზღვრული სერვისის/პროგრამის შესრულებისას 14 წელი შეუსრულდა, შესაბამის სერვისში/პროგრამაში შეიძლება ჩართული იყოს მულტიდისციპლინური ჯგუფის მიერ ამ მუხლის მე-7 პუნქტით გათვალისწინებული გადაწყვეტილებით განსაზღვრული ვადის ამოწურვამდე. ამ ვადის გაგრძელება მისი ამოწურვის შემდეგ დაუშვებელია.
9.კანონთან კონფლიქტში მყოფი არასრულწლოვანისთვის შესაბამისი სერვისის/პროგრამის განსაზღვრისას ამ არასრულწლოვანის საუკეთესო ინტერესების, ინდივიდუალური საჭიროებებისა და მახასიათებლების გათვალისწინებით, მულტიდისციპლინური ჯგუფის გადაწყვეტილებით შეიძლება განისაზღვროს შესაბამის სერვისში/პროგრამაში კანონიერი წარმომადგენლის ან კანონთან კონფლიქტში მყოფი არასრულწლოვანის ოჯახის სხვა წევრის ჩართულობა.
10.ამ მუხლით განსაზღვრულ მულტიდისციპლინური ჯგუფის გადაწყვეტილებათა შესახებ დაუყოვნებლივ ეცნობებათ კანონთან კონფლიქტში მყოფ არასრულწლოვანს, მის კანონიერ წარმომადგენელს და პირს/დაწესებულებას/უწყებას, რომლის მიერ ორგანიზებულ სერვისში/პროგრამაში უნდა ჩაერთოს ეს არასრულწლოვანი, აგრეთვე სააგენტოს, თუ იგი ჩართულია კანონთან კონფლიქტში მყოფი არასრულწლოვანის კეთილდღეობის უზრუნველყოფის, რეაბილიტაციისა და მხარდაჭერის პროცესში.
11.მულტიდისციპლინური ჯგუფის გადაწყვეტილება კანონთან კონფლიქტში მყოფი არასრულწლოვანის შესაბამის სერვისში/პროგრამაში ჩართვის შესახებ სავალდებულოა შესასრულებლად.
12.მულტიდისციპლინური ჯგუფის შემადგენლობას და საქმიანობის წესს ამტკიცებს საქართველოს მთავრობა. მულტიდისციპლინური ჯგუფის საქმიანობის ორგანიზაციულ-სამართლებრივ უზრუნველყოფას ახორციელებს ცენტრი.