1.უძრავი ნივთის სააღრიცხვო ბარათი არის დადგენილი ფორმის დოკუმენტი, რომელიც შეიცავს შემდეგ მონაცემებს: ა) უძრავი ნივთის საკადასტრო კოდს; ბ) ფართობს (დაზუსტებულს, დაუზუსტებელს); გ) მისამართს (ადგილმდებარეობას); დ) მიწის ნაკვეთის დანიშნულებას; ე) საკუთრების უფლების სახეს; ვ) წინა საკადასტრო კოდს; ზ) მესაკუთრის (თანამესაკუთრეების) საიდენტიფიკაციო მონაცემებს; თ) უფლების დამადასტურებელი დოკუმენტების ჩამონათვალს და რეკვიზიტებს; პირველადი რეგისტრაციისას – საკუთრების დამადასტურებელი საბუთების ჩამონათვალს და რეკვიზიტებს; ი) თანამესაკუთრეთა წილობრივ მონაცემებს; კ) მიწის ნაკვეთთან მყარად დაკავშირებული ობიექტების საკადასტრო კოდებსა და მონაცემებს; ლ) უძრავ ნივთზე საკუთრების უფლების შეზღუდვის (სარგებლობის) ან ვალდებულებითი დატვირთვის დამადასტურებელი დოკუმენტების ჩამონათვალს, რეკვიზიტებსა და შეზღუდვის შინაარსს; მ) იმ პირების საიდენტიფიკაციო მონაცემებს, რომელთა სასარგებლოდაც შეზღუდულია ან დატვირთულია უფლება; ნ) უფლების დამადასტურებელი საბუთების არსებით პირობებს; ო) საქართველოს სამოქალაქო კოდექსის 315-ე მუხლით გათვალისწინებულ წინასწარ ჩანაწერს სამომავლო ან/და პირობითი მოთხოვნის უზრუნველსაყოფად სანოტარო წესით დამოწმებული ისეთი გარიგების მოთხოვნების შესახებ, რომელიც გავლენას ახდენს ან მოახდენს უძრავ ნივთზე საკუთრების ან სხვა სანივთო უფლებაზე; პ) უძრავი ნივთის მოთხოვნის უზრუნველყოფის საშუალებად გამოყენების დამადასტურებელი დოკუმენტის დასახელებასა და რეკვიზიტებს; ჟ) მოთხოვნაზე უფლებამოსილი პირის საიდენტიფიკაციო მონაცემებს; რ) იპოთეკის სახესა და მისი უზრუნველყოფის პირობებს.
2.თითოეულ მიწის ნაკვეთზე, ბინაზე/ერთეულზე ან დამოუკიდებელი სანივთო უფლების მქონე უძრავ ნივთზე ივსება ინდივიდუალური სააღრიცხვო ბარათი.
3.სააღრიცხვო ბარათის განუმეორებელი ნომერი იდენტურია მიწის ნაკვეთის საკადასტრო კოდისა.
4.სააღრიცხვო ბარათის ძალაში მყოფი ჩანაწერები წარმოადგენს უძრავი ნივთის სამართლებრივი მდგომარეობის განმსაზღვრელ იურიდიულ საფუძველს.
5.სააღრიცხვო ბარათში ჩანაწერების შეტანა, შეცვლა ან გაუქმება წარმოებს უფლების დამადასტურებელი საბუთების და უძრავი ნივთის საკადასტრო მონაცემების საფუძველზე.
6.სააღრიცხვო ბარათს ხელს აწერს და ბეჭდით ამოწმებს სახელმწიფო რეგისტრატორი.
