1.,,სახელმწიფო შესყიდვების შესახებ’’ კანონის მე-13 მუხლის თანახმად ტენდერში საქართველოსა და უცხო ქვეყნების პრეტენდენტების მონაწილეობის შემთხვევაში საქართველოს რეზიდენტის მიერ წარდგენილი სატენდერო წინადადებების ღირებულების მიმართ გამოყენება პრეფერენციული შეღავათი 15 პროცენტის ფარგლებში 2. პრეფერენციული შეღავათი გამოყენება მხოლოდ ფასის კრიტერიუმით შეფასებისას და მხოლოდ იმ შემთხვევებში, როდესაც საქართველოს ტერიტორიაზე რეგისტრირებული იურიდიული ან ფიზიკური პირის მიერ შემოთავაზებული სატენდერო წინადადების ფასი აღემატება უცხოელი პრეტენდენტების სატენდერო წინადადების ფასს არა უმეტეს 15 პროცენტით.
3.საქონლის შესყიდვის შემთხვევაში პრეფერენციული შეღავათი ენიჭება საქართველოს ტერიტორიაზე რეგისტრირებულ მეწარმეებს, თუ მათ მიერ შემოთავაზებული საქონელი წარმოებულია საქართველოს ტერიტორიაზე, რაც დადასტურებული უნდა იქნეს შესაბამისი შესყიდვის ობიექტის წარმოშობის ქვეყნის სერტიფიკატით.
4.იმ შემთხვევაში, როდესაც შეფასებისათვის დაშვებულ სატენდერო წინადადებათა შორის წარმოდგენილია ადგილობრივი და უცხოური პრეტენდენტების სატენდერო წინადადებები, პრეფერენციული შეღავათის გამოყენების საფუძველის არსებობის დადგენის მიზნით სატენდერო კომისია ახდენს სატენდერო წინადადებების დაყოფას შემდეგ ჯგუფებად: ა) საქართველოს ტერიტორიაზე რეგისტრირებული იურიდიული ან/და ფიზიკური პირების სატენდერო წინადადებები; ბ) უცხო სახელმწიფოთა იურიდიული და ფიზიკური პირების სატენდერო წინადადებები.
5.დაჯგუფების შემდეგ ,,ბ“ ჯგუფში გაერთიანებული სატენდერო წინადადებებიდან შეირჩევა წინადადება ყველაზე დაბალი ფასით, რომელიც უნდა შედარდეს ,,ა“ ჯგუფში შეტანილ ყოველი სატენდერო წინადადების შესაბამის ფასთან. პრეფერენციული შეღავათი გამოიყენება ,,ა“ ჯგუფის იმ სატენდერო წინადადებების მიმართ, რომელთა ფასი აღემატება ,,ბ“ ჯგუფის მინიმალური ფასის მქონე წინადადების ფასის არა უმეტეს 15 პროცენტით (სხვაობის პროცენტული სიდიდის გაანგარიშების დროს 100 პროცენტად მიჩნეული უნდა იქნეს ,,ა“ ჯგუფის სატენდერო წინადადებების ფასები).
6.იმ სატენდერო წინადადებების ფასებს, რომლების მიმართ ამ მუხლის მე-4 და მე-5 პუნქტების შესაბამისად გამოიყენება პრეფერენციული შეღავათი, უნდა გამოაკლდეს ,,ბ“ ჯგუფის ყველაზე დაბალი ფასის მქონე სატენდერო წინადადების ფასის 15 პროცენტი, ხოლო შემდგომ ყველა წინადადების შეფასება ხდება ამ დებულების მე-20 მუხლით განსაზღვრული წესით.
7.თუ ამ დებულების მე-17 მუხლის მე-9 პუნქტით გათვალისწინებულ შემთხვევებში თანაბარ შეფასებას მიიღებენ ,,ა“ და ,,ბ“ ჯგუფების პრეტენდენტები, უპირატესობა ენიჭება ,,ა“ ჯგუფის პრეტენდენტს (პრეფერენციული შეღავათის გამოყენების საფუძვლის არსებობის შემთხვევაში).
8.იმ შემთხვევაში, თუ ტენდერში გამარჯვებულად მიჩნეული იქნება ,,ა“ ჯგუფის პრეტენდენტი, რომლის მიმართაც იყო გამოყენებული პრეფერენციული შეღავათი, მასთან დადებულ ხელშეკრულებაში უნდა დაფიქსირდეს მის სატენდერო წინადადებაში მითითებული ფასი.