მუხლი 31. ხელახალი ხმის მიცემა

1. ხელახალი ხმის მიცემა საარჩევნო ოლქში ინიშნება საერთო არჩევნებიდან ორი კვირის თავზე, თუ ამ ოლქში არჩევნები ბათილად იქნა ცნობილი. ხელახალ ხმის მიცემაში მონაწილეობის უფლება აქვთ ამ ოლქში არჩევნებში მონაწილე ყველა პარტიას, საარჩევნო ბლოკსა და დამოუკიდებელ კანდიდატს.

2. ხელახალი ხმის მიცემისას არჩევნები ჩატარებულად ჩაითვლება მიუხედავად მასში მონაწილე ამომრჩეველთა რაოდენობისა.

3. ხელახალი ხმის მიცემისას კენჭისყრა, ხმების დათვლა და არჩევნების შედეგების დადგენა ხდება ამ კანონით განსაზღვრული წესის შესაბამისად. სათანადო ოქმი ცენტრალურ საარჩევნო კომისიას უნდა ჩაბარდეს ხუთი დღის ვადაში, ხოლო არჩევნების შედეგები უნდა გამოქვეყნდეს ერთი კვირის ვადაში.