მუხლი 14. დირექტორის ფუნქციები

1.დირექტორის ფუნქციებია: ა) სამსახურის ხელმძღვანელობა, იურიდიული დახმარების ბიუროს, საკონსულტაციო ცენტრისა და მიმწოდებლის საქმიანობის ზედამხედველობა; ბ) სამსახურის დებულებისა და სამსახურის სტრატეგიის შემუშავება და დასამტკიცებლად საქართველოს მთავრობისთვის წარდგენა; გ) სამსახურის სტრატეგიის შესრულების მონიტორინგის განხორციელება; დ) ყოველწლიურად, არაუგვიანეს 1 მარტისა, საქართველოს პრემიერ-მინისტრისთვის სამსახურის წინა წლის საქმიანობის შესახებ ანგარიშის წარდგენა; ე) სამსახურის საშტატო ნუსხისა და თანამშრომელთა შრომის ანაზღაურებისთვის გამოყოფილი თანხის ზღვრული ოდენობის დასამტკიცებლად საქართველოს მთავრობისთვის წარდგენა; ვ) საქართველოს მთავრობის მიერ დამტკიცებული თანამშრომელთა შრომის ანაზღაურებისთვის გამოყოფილი თანხის ზღვრული ოდენობის ფარგლებში თანამშრომელთა შრომის ანაზღაურების ოდენობების განსაზღვრა; ზ) სამსახურის სახელმწიფო მნიშვნელობის სიმბოლოს ნიმუშისა და მისი გამოყენების წესის დამტკიცება „სახელმწიფო მნიშვნელობის სიმბოლოების შესახებ“ საქართველოს კანონის შესაბამისად; თ) საქართველოს ფინანსთა სამინისტროსთვის სამსახურის ბიუჯეტის პროექტისა და სამსახურის ბიუჯეტის შესრულების შესახებ ანგარიშის წარდგენა; ი) იურიდიული დახმარების ბიუროს, საკონსულტაციო ცენტრის შექმნა და გაუქმება, აგრეთვე იურიდიული დახმარების ბიუროსა და მიმწოდებლის სამოქმედო ტერიტორიების განსაზღვრა; კ) იურიდიული დახმარების ბიუროს, საკონსულტაციო ცენტრის, მიმწოდებლისა და რეესტრში რეგისტრირებული ადვოკატის ანგარიშგების წესისა და ფორმის დამტკიცება; ლ) რეესტრში რეგისტრირებული ადვოკატის საქმეში ჩართვის პროცედურის, შრომის ანაზღაურების ოდენობისა და გაცემის წესის დამტკიცება; მ) რეესტრში რეგისტრირებული ადვოკატის მიერ კვალიფიციური იურიდიული დახმარების გაწევის უზრუნველყოფა და გაწეული მომსახურების ხარისხის კონტროლი სამსახურის დებულებით დადგენილი წესით; ნ) სამსახურის შინაგანაწესის დამტკიცება; ო) სამსახურის მიერ სტატისტიკის წარმოების კოორდინაცია და მისი ანალიზი; პ) აპარატის, იურიდიული დახმარების ბიუროსა და საკონსულტაციო ცენტრის თანამშრომელთა თანამდებობებზე დანიშვნა და თანამდებობებიდან გათავისუფლება, აგრეთვე მათ მიმართ დისციპლინური ზემოქმედებისა და წახალისების ღონისძიებათა გამოყენება საქართველოს კანონმდებლობით დადგენილი წესით; ჟ) სამსახურის მიერ გაწეული იურიდიული კონსულტაციისა და იურიდიული დახმარების ხარისხის შეფასების წესისა და კრიტერიუმების დამტკიცება და მათი შესრულების ზედამხედველობა; რ) იურიდიული დახმარების ბიუროს, საკონსულტაციო ცენტრისა და მიმწოდებლის საქმიანობასთან დაკავშირებული საჩივრების, აგრეთვე იურიდიულ დახმარებაზე უარის თქმის საფუძვლიანობის განხილვა საქართველოს კანონმდებლობით დადგენილი წესით; ს) ამ კანონის მე-5 მუხლის 2​ 6 პუნქტის „ბ“ ქვეპუნქტითა და მე-3 პუნქტით გათვალისწინებული იურიდიული დახმარების გაწევის კრიტერიუმების დამტკიცება, რომელთა საფუძველზედაც მან შეიძლება მიიღოს გადაწყვეტილება პირისთვის იურიდიული დახმარების გაწევის შესახებ; ტ) სასწავლო კურსებისა და სემინარების ჩატარების უზრუნველყოფა სამსახურის თანამშრომელთა და საზოგადოებრივ ადვოკატთა გადასამზადებლად და მათი კვალიფიკაციის ასამაღლებლად; უ) სამსახურის ფინანსური აღრიცხვა-ანგარიშგების ორგანიზება საქართველოს კანონმდებლობით დადგენილი წესით; ფ) სამსახურის საქმიანობის შესახებ წლიური ანგარიშის საჯაროობისა და ხელმისაწვდომობის უზრუნველყოფა; ქ) სამსახურის საქმიანობის პოპულარიზაციის უზრუნველყოფა; ღ) იურიდიული დახმარებისა და იურიდიული კონსულტაციის ხელმისაწვდომობისა და ხარისხის შესასწავლად კვლევის განხორციელება; ყ) თავისი კომპეტენციის ფარგლებში ადმინისტრაციულ-სამართლებრივი აქტების გამოცემა; შ) ამ კანონითა და სამსახურის დებულებით განსაზღვრული სხვა უფლებამოსილებების განხორციელება.

2.დირექტორი უფლებამოსილია იურიდიული დახმარების ბიუროს ხელმძღვანელს, ადვოკატსა და კონსულტანტს შეუწყვიტოს შრომითი ხელშეკრულებები საქართველოს ორგანული კანონით „საქართველოს შრომის კოდექსი“ დადგენილი წესით.

3.დირექტორის გადაწყვეტილება შეიძლება გასაჩივრდეს მხოლოდ სასამართლოში. საქართველოს 2008 წლის 30 დეკემბრის კანონი №968 - სსმ I, №41, 30.12.2008 წ., მუხ.340 საქართველოს 2013 წლის 13 დეკემბრის კანონი №1779 - ვებგვერდი, 28.12.2013წ. საქართველოს 2019 წლის 22 თებერვლის კანონი №4317 – ვებგვერდი, 07.03.2019წ. საქართველოს 2026 წლის 4 მარტის კანონი №1374 – ვებგვერდი, 05.03.2026წ.