ექსპროპრიაციის უფლების საფუძველი და სასამართლოს გადაწყვეტილება
აუცილებელი საზოგადოებრივი საჭიროებისათვის საკუთრების ჩამორთმევა საქართველოს კონსტიტუციის შესაბამისად დასაშვებია მხოლოდ ექსპროპრიაციის გზით. ექსპროპრიაციის უფლების მინიჭება ხორციელდება მინისტრის ბრძანების საფუძველზე და სასამართლოს გადაწყვეტილებით: მინისტრის ბრძანებით განისაზღვრება ექსპროპრიაციის გარდაუვალობა და სუბიექტი, რომელსაც შეიძლება ეს უფლება მიენიჭოს, ხოლო ექსპროპრიაციის შესახებ გადაწყვეტილებას იღებს სასამართლო — იგი ადგენს იმ სახელმწიფო ორგანოს, მუნიციპალიტეტს ან საჯარო/კერძო სამართლის იურიდიულ პირს, რომელსაც უფლება ენიჭება.
სასამართლოს გადაწყვეტილება აგრეთვე უნდა შეიცავდეს საექსპროპრიაციო ქონების დეტალურ აღწერას და შესაბამის მითითებას მესაკუთრის წინასწარი, სრული და სამართლიანი კომპენსაციით უზრუნველყოფის თაობაზე. საკითხს განიხილავს რაიონული (საქალაქო) სასამართლო, დაინტერესებული პირი მას განცხადებით მიმართავს; განცხადებას უდევს პროექტის დეტალური აღწერა, მინისტრის შესაბამისი ბრძანება, ქონების დეტალური აღწერა და ინფორმაციის გამოქვეყნების დამადასტურებელი საბუთი. გადაწყვეტილება აღსრულდება დაუყოვნებლივ აღსასრულებელი გადაწყვეტილების წესით.