საცდელი გაშვება და კომპლექსური გასინჯვა
მზის ფერმის ექსპლუატაციაში მისაღებად „ენერგეტიკისა და წყალმომარაგების შესახებ“ საქართველოს კანონის მე-36 მუხლი სავალდებულო ეტაპად განსაზღვრავს ობიექტის საცდელ გაშვებას ან/და კომპლექსურ გასინჯვას. საწარმომ, რომელმაც ელექტროენერგიის წარმოების ობიექტი ააშენა ან რეკონსტრუქცია განახორციელა — მათ შორის, გაზარდა მისი სიმძლავრე — და კანონმდებლობით დადგენილი წესითა და ტექნიკური მოთხოვნების დაცვით მიაერთა იგი გადამცემ ან გამანაწილებელ ქსელთან, საცდელი გაშვებისთვის ან/და კომპლექსური გასინჯვისთვის უნდა მიმართოს შესაბამისი სისტემის ოპერატორს, და გადამცემი სისტემის ოპერატორის წარმომადგენლები ამ პროცესში მონაწილეობენ. გასინჯვა და ექსპლუატაციაში მიღებაზე თანხმობა ხორციელდება ქსელის წესებით დადგენილი წესით, ხოლო თუ წესებით სხვა რამ არ არის დადგენილი, ოპერატორმა თანხმობა ან უარი საცდელი გაშვებიდან არაუმეტეს 90 კალენდარული დღის ვადაში უნდა განაცხადოს. ამ პერიოდში ობიექტის მფლობელი საწარმო ლიცენზიის მოპოვების ვალდებულებისგან გათავისუფლებულია, წარმოებული ელექტროენერგიის ყიდვა-გაყიდვა კი ელექტროენერგიის ბაზრის წესებით რეგულრდება. ექსპლუატაციაში მიღებული ობიექტით წარმოება დაიშვება მხოლოდ წარმოების ლიცენზიის საფუძველზე, ხოლო კანონით გათვალისწინებულ გამონაკლის შემთხვევებში — უფლებამოსილი ორგანოს მიერ გაცემული ექსპლუატაციაში მიღების დამადასტურებელი დოკუმენტით.
წარმოების ხელშეწყობის პრინციპები
კანონის მე-37 მუხლის თანახმად, ელექტროენერგიის წარმოების ხელშეწყობა რეგულრდება გამჭვირვალედ და არადისკრიმინაციულად, ეკონომიკური მიზანშეწონილობის, საბოლოო მომხმარებლის მინიმალური დანახარჯებისა და ელექტროენერგეტიკულ ბალანსსა და სისტემის ოპერირებაზე ზეგავლენის კრიტერიუმების გათვალისწინებით. განახლებადი ენერგიების წყაროებიდან ელექტროენერგიის წარმოება და მაღალი ეფექტიანობის კოგენერაცია შეიძლება წახალისდეს საკანონმდებლო აქტებით ან მთავრობის ნორმატიული აქტებით დადგენილი წახალისებისა და მხარდაჭერის მექანიზმებით — იმ დონის მისაღწევად, რომელიც ენერგეტიკული გაერთიანების კანონმდებლობით საქართველოსთვის არის დადგენილი. აღნიშნული წესები უნდა მოიცავდეს მხარდაჭერის მექანიზმებს, ენერგეტიკული საწარმოების უფლებებსა და მოვალეობებს, წახალისებული წარმოების პირობებსა და დაკავშირებულ მარეგულირებელ მოთხოვნებს, ხოლო ყოველი წამახალისებელი ღონისძიება საჭიროების შემთხვევაში უნდა დასაბუთდეს კონკურენციისა და სახელმწიფო დახმარების მარეგულირებელი კანონმდებლობის შესაბამისად.