1.სამინისტრო განათლებისა და მეცნიერების სფეროში ერთიანი სახელმწიფო პოლიტიკის გამტარებელი ორგანოა. საკუთარი კომპეტენციის ფარგლებში სამინისტრო ახორციელებს თავის დაქვემდებარებაში არსებული ყოველი რგოლის საქმიანობის კოორდინაციასა და კონტროლს, უზრუნველყოფს ზოგადი, პროფესიული და უმაღლესი განათლების სრულყოფას, მეცნიერების განვითარებას, ბავშვისათვის ზრუნვას და სახელმწიფო ენობრივი პოლიტიკის განხორციელებას.
2.კანონმდებლობით მინიჭებულ უფლებამოსილებათა ფარგლებში სამინისტრო: ა) უზრუნველყოფს განათლების მიღებისა და მისი ფორმის არჩევის კონსტიტუციური უფლების განხორციელებას; ბ) იკვლევს და აფასებს განათლებისა და მეცნიერების სისტემაში მიმდინარე პროცესებს; გ) გეგმავს განათლებისა და მეცნიერების სისტემის შემდგომი განვითარების მიმართულებებს, ახორციელებს მისი განვითარების პროგნოზირებას; დ) კანონმდებლობით დადგენილი წესის შესაბამისად შეიმუშავებს და ამტკიცებს საგანმანათლებლო პროგრამებს, სახელმწიფო საგანმანათლებლო სტანდარტებს და აკონტროლებს მათ შესრულებას; ე) ახორციელებს აღმზრდელობით-საგანმანათლებლო დაწესებულებათა ლიცენზირებას, საგანმანათლებლო დაწესებულებების აკრედიტაციას შესაბამისი ატესტაციის საფუძველზე; ვ) სახელმწიფო საგანმანათლებლო სტანდარტების შეუსრულებლობის შემთხვევაში ატესტაციის საფუძველზე აუქმებს საგანმანათლებლო დაწესებულების (გარდა უმაღლესი სასწავლებლებისა) აკრედიტაციას; ზ) იღებს გადაწყვეტილებას სახელმწიფო სააღმზრდელო და საგანმანათლებლო დაწესებულებათა ლიკვიდაციის შესახებ (გარდა უმაღლესი სასწავლებლებისა), უფლებამოსილია ლიცენზიის პირობების დარღვევის შემთხვევაში საქართველოს სამოქალაქო საპროცესო კოდექსის შესაბამისად სარჩელით მიმართოს შესაბამის სასამართლოს საგანმანათლებლო და აღმზრდელობითი საქმიანობის ლიცენზიის გასაუქმებლად; თ) ჰარმონიზაციისა და ინტეგრაციის მიზნით, დადგენილი წესის შესაბამისად თანამშრომლობს განათლებისა და მეცნიერების სფეროში მოქმედ საერთაშორისო ორგანიზაციებთან და საზღვარგარეთის ქვეყნების შესაბამის საგანმანათლებლო დაწესებულებებთან; ი) უზრუნველყოფს განათლებისა და მეცნიერების შესახებ ნორმატიული აქტების შესრულებას; კ) ახორციელებს სახელმწიფო პოლიტიკას სკოლამდელი აღზრდის, შვილად აყვანის, ობოლ და მშობელთა მზრუნველობას მოკლებულ ბავშვთა შვილობილად აყვანის სფეროში; ლ) ხელს უწყობს საქართველოს სახელმწიფო ენის – ქართულის (აფხაზეთის ტერიტორიაზე, აგრეთვე აფხაზურის) განვითარებას; მ) ამტკიცებს სააღმზრდელო და საგანმანათლებლო დაწესებულებათა, პედაგოგთა, მოსწავლეთა და სტუდენტთა ატესტაციის კრიტერიუმებსა და წესს; ნ) ამტკიცებს: – იმ პროფესიათა და სპეციალობათა ნუსხას, რომელთა მიღება დასტურდება სახელმწიფო საგანმანათლებლო სერტიფიკატით; – ერთიანი სახელმწიფო საგანმანათლებლო სერტიფიკატების ნიმუშებს; – აკადემიური ხარისხებისა და მათი მინიჭების დებულებას; – უცხოეთის ქვეყნებში მიღებული განათლების დამადასტურებელი სერტიფიკატისათვის სახელმწიფო საგანმანათლებლო ცენზის მინიჭების წესსა და პირობებს; – საგანმანათლებლო და სააღმზრდელო დაწესებულებათა ტიპურ დებულებებს; ო) ქმნის სასკოლო ოლქებს, განსაზღვრავს სასკოლო ოლქების სამმართველოს სტრუქტურას და ადგენს მის დებულებას; თანამდებობაზე ნიშნავს და თანამდე-ბობიდან ათავისუფლებს სასკოლო ოლქის ხელმძღვანელს; სასკოლო ოლქის სამმართველოს წარდგინებით თანამდებობაზე ნიშნავს და თანამდებობიდან ათავისუფლებს განათლების განყოფილების ხელმძღვანელს; პ) შეიმუშავებს წინადადებებს სამეცნიერო-კვლევითი და ტექნოლოგიური განვითარების სფეროში ერთიანი სახელმწიფო პოლიტიკის, პრიორიტეტულ მიმართულებათა განსახორციელებლად საჭირო სახელმწიფო სამეცნიერო-ტექნოლოგიური პროგრამების (პროექტების) თაობაზე, კოორდინაციასა და კონტროლს უწევს მათ შესრულებას; ჟ) მონაწილეობს სამეცნიერო-ტექნოლოგიური სფეროს საერთაშორისო თანამშრომლობაში, აანალიზებს საზღვარგარეთის ქვეყნებში არსებული მეცნიერების სტრუქტურას, განსაზღვრავს სამეცნიერო კვლევისა და ტექნოლოგიური განვითარების ტენდენციებს; რ) განათლებისა და მეცნიერების განვითარების მიმართულებათა განსაზღვრისათვის აწარმოებს შრომის ბაზრის კვლევასა და სპეციალისტთა მონაცემების პროგნოზირებას; ს) უზრუნველყოფს პედაგოგთა და მეცნიერთა სოციალური დაცვის ღონისძიებების განხორციელებას; ტ) უზრუნველყოფს პედაგოგიური კადრების ატესტაციას; უ) მონაწილეობს განათლებისა და მეცნიერების სფეროში სამეცნიერო-ტექნიკური კონფერენციების, სიმპოზიუმების, გამოფენებისა და კონკურსების გამართვაში; ფ) ახორციელებს კანონმდებლობით მინიჭებულ სხვა ფუნქციებს.
